ამერიკელი რეპერი ვაიკლიფ ჯინი საკუთარ ტვიტერზე ვიდეოს აქვეყნებს და წერს, რომ ლოს-ანჯელესის პოლიციამ ის ძარცვის ბრალდებით დააკავა, მიზეზი კი მხოლოდ მისი კანის ფერი გახდა.

გავრცელებული ინფორმაციით, აფროამერიკელმა კაცმა ერთ-ერთი ბენზინგასამართი სადგური გაძარცვა და ადგილიდან მიიმალა. პოლიციამ კი რეპერის მანქანა გააჩერა და მასზე ეჭვი მიიტანა.

"პოლიციას არ შეუმოწმებია ჩემი დოკუმენტები და არც დაკავების მიზეზი განუმარტავს. ისე მეპყრობოდნენ, როგორც ნამდვილ კრიმინალს, ამის მიზეზი კი მხოლოდ ჩემი კანის ფერი გახდა. სამწუხაროდ, ეს ბევრ რამეზე მეტყველებს", - ამბობს ჯანი.

ლოს-ანჯელესის პოლიცია ამ ამბავს საკუთარ ფეისბუქზე გამოეხმაურა და ბოდიში მოიხადა. მათი თქმით, რეპერის მანქანა მძარცველისას ჰგავდა, რამაც გამოიწვია გაუგებრობა.