ქართული ოცნების წევრის, დავით სერგეენკოს განცხადებით, პრემიერმინისტრის, ირაკლი ღარიბაშვილის თანამდებობიდან წასვლის შესახებ არაფერი სმენია. ამაზე მან პარლამენტში ჟურნალისტებთან ისაუბრა.

"ირაკლი ღარიბაშვილის წასვლის შესახებ არაფერი არ მსმენია. თუკი არის ამაზე კონსულტაციები, მე მასში არ ვმონაწილეობ. არ ვიცი უბრალოდ ამის შესახებ არაფერი. არა მგონია, რომ ეს სერიოზული საბაბი იყოს პრემიერმინისტრის შესაცვლელად, ყოველ შემთხვევაში, მე არა ვარ საქმის კურსში [...] საქართველოს მოსახლეობის საკმაოდ დიდ ნაწილს აქვს იგივე შეხედულებები, დამოკიდებულებები, რასაც ახმიანებს პრემიერი, ამიტომ ამ მხრივ რაღაც შეუსაბამობას ვერ ვხედავ", — განაცხადა მან.

ბოლო რამდენიმე დღეა მედიებში ვრცელდება ინფორმაცია, რომ ქართული ოცნება პრემიერმინისტრის, ირაკლი ღარიბაშვილის გადაყენებას აპირებს. მედიები წყაროებზე დაყრდნობით აცხადებენ, რომ გადაწყვეტილება უკვე მიღებულია და მხოლოდ თარიღი დარჩა განსახილველი.