სამეფო კარის თამაშების მეშვიდე სეზონზე უკვე ბევრი რამ ვიცით, მაგალითად ის, რომ მეშვიდე სეზონის პრემიერამდე Reddit-ის ერთ-ერთმა იუზერმა Game of Thrones-ის ახალი სეზონის ყველა მომავალი სერიის მოკლე შინაარსი დადო, მოგვიანებით კი ფოტო სპოილერებიც გავრცელდა, სადაც ჩანს, რომ სამეფო კარის თამაშების მეშვიდე სეზონის ერთ-ერთი მთავარი ფიგურა ეურონ გრეიჯოი იქნება.

ვნახეთ ისიც, რომ ახალ სეზონში ერთმანეთს ჯონ სნოუ და დაენერის ტარგარიენი ხვდებიან. სავარაუდოდ, ისინი ერთმანეთს ალიანსის შესაქმნელად შეხვდნენ. ამ კავშირის მიზანი კი, ცხადია, ახლად გამეფებული სერსეი ლანისტერის ტახტიდან ჩამოგდებაა.

თუმცა ეს საკმაოდ რთული საქმე იქნება, რადგან ლინა ჰიდიმ სერსეი ლანისტერის ბედზე ისაუბრა და თქვა, რომ სერსეი აუცილებლად გააკეთებს იმას, რაც მას დასჭირდება იმისთვის, რომ დარჩეს ძლიერ და ძალაუფლების მქონე პერსონაჟად.

თავად ავტორი, ჯორჯ მარტინი კი გვაფრთხილებს, რომ ბედნიერი დასასრულის იმედი არ უნდა გვქონდეს.

რაც შეეხება ახალ ამბებს, სულ ცოტა ხნის წინ საკულტო სერიალის მეშვიდე სეზონის პირველი თიზერი გამოვიდა.

ხმალი, რომელსაც კადრში ვხედავთ სტარკების სახლის საკუთრებაა, რომელიც ხელში ტაივინ ლანისტერმა ჩაიგდო, გადაადნო და ორი ხმალი გამოჭედა, ერთი, მცირე ზომის ჯოფრის მისცა და მეორე ჯეიმის, რომელმაც ხმალი ბრიენას გადასცა. მეექვსე სეზონში ბრიენა ცდილობდა ხმალი ჯეიმისთვის დაებრუნებინა, რადგან მან მთავარი მისია შეასრულა და სოფია ტერნერის პერსონაჟი სანსა უსაფრთხოდ მიიყვანა სახლში, თუმცა ჯეიმიმ ხმალი არ გამოართვა და უთხრა, რომ ის მას ეკუთვნოდა.

საინტერესოა, ვის ეჭირა ეს ხმალი მეშვიდე სეზონის პირველ ტიზერში?

წესით და რიგით ხმალი კვლავ ბრიენასთან არის, თუმცა ვიდეოში აშკარად ჩანს რომ ეს მისი ხელი ნამდვილად არ არის.

შესაძლოა თუ არა ვივარაუდოთ, რომ ბრიენა მოკლეს და ხმალი ისე წაართვეს? თუ მას არ უჭირავს, რა თქმა უნდა, ეს სრულიად დასაშვები იქნება. სამეფო კარის თამაშებში ყველაფერი ნებადართულია.

მით უმეტეს თუ გავითვალისწინებთ ჯორჯ მარტინის წიგნს, სადაც ვკითხულობთ, რომ ბრიენა მკვდრეთით აღმდგარმა კეტლინ სტარკმა გამოასალმა სიცოცხლეს.

საინტერესოა, თუ ეს არ არის ბრიენას ხელი, მაშინ ვის უჭირავს ხმალი?

შესაძლოა თუ არა ეს იყოს ჯეიმი ლანისტერი?

სავარაუდოდ არა, რადგან თიზერისგან განსხვავებით მისი ხელები დაჭორფლილი არ არის.

ბევრი ძიება რომ არ დავიწყოთ და ყველა მსახიობის ხელს არ დავაკვირდეთ, გეტყვით რომ თიზერთან ყველაზე ახლოს ჯორა მორმონტის ვერსიაა.

საინტერესოა როგორ მოხვდა (თუ ეს ნამდვილად ასეა) ხმალი მის ხელში? ისღა დაგვრჩენია დაველოდოთ ზაფხულს და გავიგოთ როგორ გაგრძელდება ბრძოლა რკინის ტახტისთვის.

ბონუსად კი კიდევ ერთი თიზერი, სადაც რკინის ტახტზე აღზევებული სერსეი ლანისტერი ჩანს.

მეშვიდე სეზონი ზაფხულში, 25 ივნისს გამოვა და ტრადიციული 10 სერიის ნაცვლად ამჯერად 7 ეპიზოდისგან შედგება.