ყველასათვის საყვარელი პატარა ქალთევზა ეკრანებზე მალე ფილმის სახით დაბრუნდება, რომელშიც მთავარ როლს ამერიკელი მუსიკოსი და მსახიობი ჰოლი ბეილი ასრულებს. გადაღებები უკვე დასრულებულია და ამის შესახებ ჰოლიმ გულშემატკივრებს არიელის პირველი ფოტოთი ახარა.

ფოტო სარდინიის კუნძულის სანაპიროზეა გადაღებული, სადაც დისნეის ახალ არიელს, როგორც ჩანს, ქალთევზას კუდი აქვს მორგებული.

დისნეი ახალ ფილმზე დიდი ხანია მუშაობს. ჰოლიმ როლი 19 წლის ასაკში, დაახლოებით 2 წლის წინ მიიღო, თუმცა კორონავირუსის გავრცელების ფონზე გადაღებები რამდენჯერმე გადაიდო.

"ოცნებები სრულდება" — წერდა როლის მიღებით გახარებული ჰოლი 2019 წელს ტვიტერზე.

მსახიობმა კორონავირუსის დროს ფილმის გადაღების პროცესზე ინსტაგრამ პოსტში ისაუბრა. მისი თქმით, ყველასა და ყველაფრისგან შორს ყოფნა მნიშვნელოვანი გამოცდილება აღმოჩნდა და რთული გზის ბოლოს საოცარი სიმტკიცეც მოიპოვა.

"აღნიშნულმა გამოცდილებამ იმაზე მეტად გამაძლიერა, ვიდრე ოდესმე წარმომედგინა", — ამბობს ჰოლი.

აღსანიშნავია, რომ ფილმში არიელის მეგობარი თევზის, ფლაუნდერის როლს ჯეიკობ თრემბლი, ურსულას როლს — მელისა მაკარტი, მეფე ტრიტონის როლს — ხავიერ ბარდემი, პრინცი ერიკის როლს კი ჯონა ჰაუერ-კინგი ასრულებს.