Aerosmith-ის კონცერტის ბილეთების გაყიდვა ბლექ სი არენას ჯამში 63 012 ლარი დაუჯდა. ბილეთების გაყიდვით კი, კომპანიამ შემოსავლის სახით, 1 050 200 ლარი მიიღო.

ბლექ სი არენამ Aerosmith-ის ბილეთების გასაყიდად ორ კომპანიასთან - შპს ელ. ბილეთებთან (biletebi.ge) და შპს ონლაინ თიქეთსისთან (tkt.ge) თანამშრომლობდა. ამ თანამშრომლობის ფარგლებშივე გათვალისწინებული იყო მათ ვებგვერდებზე კონცერტის რეკლამის განთავსება.

შპს ონლაინ თიქეთსი-მ კონცერტის 875 200 ლარის ღირებულების ბილეთები გაყიდა და შემოსავლის სახით 52 512 ლარი მიიღო, შპს ელ.ბილეთებმა კი - 175 ათასი ლარის ბილეთების გაყიდვით 10 500 ლარი.

On.ge-ს აინტერესებდა, რაში დახარჯავს ბლექ სი არენა მიღებულ შემოსავალს. თუმცა, კომპანიის არც დირექტორმა და არც საზოგადოებასთან ურთიერთობის სამსახურის უფროსმა სატელეფონო ზარებს არ უპასუხეს.

2017 წელს საქართველოში Aerosmith-ის კონცერტის გასამართად ხელშეკრულება მიმდინარე წლის 11 იანვარს გაფორმდა. ხელშეკრულების ღირებულება, გადასახადების გარეშე, 1,5 მილიონი ამერიკული დოლარია, რაც მისი გაფორმების მომენტისთვის 4 110 450 ლარი იყო. ამ თანხად აეროსმიტის კონცერტს 90 წუთის განმავლობაში გამართავს.