ტეხასელი კოლბი უოტსონი მსახიობი გვინეტ პელტროუს კომპანიას, goop-ს, სასამართლოში უჩივის და მისთვის მიყენებული ზარალის ანაზღაურებას $5 მილიონით ითხოვს. მომჩივანი ამტკიცებს, რომ კომპანიის წარმოებული სანთელი "ამას ჩემი ვაგინის სუნი აქვს" თავის საძინებელში აფეთქდა.

უოტსონის ცნობით, აფეთქებამდე სამი საათით ადრე სანთელი მაგიდაზე აანთო. შემდგომ კი ის აალდა, მაგიდა ამოწვა, სანთლის ჩასადები კი დაანახშირა.

მიუხედავად იმისა, რომ აღნიშნული შემთხვევის შედეგად არავინ დაშავებულა, მომჩივანი მხარის წარმომადგენლები ზარალის ანაზღაურებას ითხოვენ მათი კლიენტისათვის და მათთვის, ვინც "უნებლიეთ შეიძინა დეფექტიანი და საშიში ვაგინისსუნიანი სანთლები".

goop-მა ბრალდება უარყო და "არასერიოზულად" შეაფასა. კომპანიის განცხადებით, ეს "სოლიდური კომპენსაციის მიღების მცდელობაა".

"ჩვენ პასუხისმგებელი ვართ იმ ბრენდებსა და პროდუქტების უსაფრთხოებაზე, რომლებსაც ვაწარმოებთ", — აღნიშნავს კომპანიის წარმომადგენელი, — "ამდენად, Heretic-ს, ბრენდს, რომელიც სანთლებს აწარმოებს, შემოწმებული აქვს პროდუქტის ხარისხი და უსაფრთხოების სტანდარტი".

უარყოფის მიუხედავად, მსგავსი შემთხვევა პირველი არაა. აპრილის თვეში სხვა ადამიანმა, ჯოდი თომპსონმა, განაცხადა, რომ სამსახურში მოგებული სანთელი მეორე საღამოს, დანთებისთანავე ისე აალდა, თითქოს "ჯოჯოხეთის კარიბჭე გახსნილიყო".

თომპსონმა მაშინ აღნიშნა, რომ შემთხვევიდან მალევე კომპანიის წარმომადგენელი დაუკავშირდა და უფასო პროდუქტები შესთავაზა. goop-ის წარმომადგენელმა კი, თავის მხრივ, განაცხადა, რომ მას კითხვები ჰქონდა, რამდენად მიჰყვა უსაფრთხოების წესებს სანთლის მფლობელი.

"ვაგინისსუნიანი სანთელი", რომელიც ამჟამად კომპანიის ონლაინმაღაზიაში ხელმიუწვდომელია, აღწერილია, როგორც "მხიარული, მომხიბვლელი, მაცდური და სასიამოვნოდ მოულოდნელობის სურნელის" მქონე. გასულ წელს goop-მა ასევე შექმნა სანთელი, დასახელებით "ამას ჩემი ორგაზმის სუნი აქვს".

ბრენდის წარმოებული პროდუქციის ინსპირაციით შარშან იუთუბერმა ითენ კლაინმა გამოუშვა "სანთელი უკანალის არომატით", რომლის გაყიდვაც საახალწლოდ დაიწყო.