მედიაზე მორიგი შეტევისას, შაბათ საღამოს, აშშ-ის პრეზიდენტმა, დონალდ ტრამპმა შვედეთში მომხდარ არარსებულ ინციდენტზე ისაუბრა. განცხადებამ ბევრი დააბნია, მაგრამ არა შვედები. BBC-ის ცნობით, ტრამპმა მხარდამჭერებს ფლორიდაში შემდეგი სიტყვებით მიმართა:

"შეხედეთ რა ხდება გერმანიაში, შეხედეთ რა მოხდა წუხელ შვედეთში. შვედეთი, ვინ დაიჯერებდა. შვედეთი. მათ დიდი რაოდენობით მიიღეს. მათ ისეთი პრობლემები აქვთ, როგორიც ვერ წარმოედგინათ."

ტრამპის განცხადებას ტვიტერზე შვედეთის ყოფი პრემიერ-მინისტრიც გამოეხმაურა: "შვედეთი? ტერორისტული აქტი? რა მოწია? კითხვა ბევრია."

მალევე ჰეშთეგი #lastnightinSweden (#წუხელშვედეთში) ტვიტერზე იტრენდებოდა და შვედეთის საელჩომ ვაშინგტონში სახელმწიფო დეპარტამენტს განმარტება სთხოვა.

მაინც რა მოხდა შვედეთში პარასკევს?

მედიაში ტერორისტული ინციდენტის შესახებ ინფორმაცია არ გავრცელებულა.

ერთ-ერთმა შვედურმა ვებსაიტმა დღის ახალი ამბები შეაჯამა:

  • სტოკჰოლმის ცენტრალურ მოედანზე კაცმა ცეცხლი წაიკიდა;
  • ცნობილ მომღერალს მელფესტის რეპეტიციებზე ტექნიკური პრობლემები შეექმნა;
  • კაცი დაიღუპა სამუშაო ადგილზე უბედური შემთხვევის შედეგად;
  • ჩრდილოეთ შვედეთში უამინდობის გამო გზებზე მოძრაობა აიკრძალა;
  • პოლიციის მანქანა სავარაუდო მთვრალ მძღოლს აედევნა.

რამდენად უსაფრთხოა შვედეთი?

საერთო ჯამში შვედეთში კრიმინალის დაბალი მაჩვენებელია. 2016 კვლევის თანახმად, ქვეყანაში დანაშაულის მაჩვენებელმა უმნიშვნელოდ მოიმატა. გაუპატიურების მაჩვენებელმა 13 პროცენტით მოიმატა, თუმცა მაინც 2014 წლის მაჩვენებელზე დაბალია. შვედეთში არ ყოფილა ტერორისტული აქტი მას შემდეგ, რაც ქვეყანამ 2013 წელს მიგრანტებს კარი გაუღო.

ასევე, შვედეთს, ევროპაში, საშუალოდ, ე.წ. ისლამური სახელმწიფოს ყველაზე მეტი მებრძოლი ჰყავს. სირიასა და ერაყში წასული 300 მოქალაქიდან, დაახლოებით 140 უკან დაბრუნდა. ხელისუფლება კი საზოგადოებაში მათი რეინტეგრაციის საუკეთესო გზებზე ფიქრობს.