"რუსეთი ჩვენი მოკავშირე არ არის, პუტინი მკვლელია", — წერს რესპუბლიკელი კონგრესმენი ადამ კინზინგერი ტვიტერზე. ის რუსეთის პრეზიდენტს ტირანსაც უწოდებს, რომელიც თავისუფლებისმოყვარულ ხალხს დევნის.

"ის დაეხმარა ასადს მოეკლა 50 000-ზე მეტი ბავშვი სირიაში და აწამებდა აქტივისტებს ბელარუსში. ის ქაოსს თესავს მთელს მსოფლიოში და დაუსჯელად მოქმედებს", — წერს კინზინგერი.

აშშ-ს პრეზიდენტმა, ჯო ბაიდენმა ინტერვიუს დროს დადებითად უპასუხა კითხვას, მიიჩნევს თუ არა რუსეთის პრეზიდენტ ვლადიმერ პუტინს მკვლელად. გარდა ამისა, ბაიდენმა განაცხადა, რომ პუტინი "გადაიხდის" ამერიკის არჩევნებში ჩარევისთვის.

მალევე რუსეთის საგარეო საქმეთა სამინისტრომ განაცხადა, რომ აშშ-დან კონსულტაციებისთვის ელჩს იწვევდა, თუმცა მიზეზად ბაიდენის განცხადება არ დაუსახელებიათ.

"ვინც იძახის იძახის, თავის თავზე იძახის", — ამ ანდაზით უპასუხა ოკუპანტი ქვეყნის რუსეთის პრეზიდენტმა, ვლადიმერ პუტინმა ბაიდენს. ჟურნალისტებთან საუბრისას, მან ასევე თქვა, რომ "ირონიის გარეშე" ბაიდენს ჯანმრთელობას უსურვებს.