"მიგვაჩნია, რომ კაბელების საქმეში ბრალი არის დაუსაბუთებელი, რომ პროკურატურამ 18 თვის განმავლობაში ვერ მოახერხა მტკიცებულებებით დაედასტურებინა წარდგენილი ბრალი და შესაბამისად განაჩენი ტოვებს ძალიან მნიშვნელოვან კითხვებს" - ამ განცხადებას ახალგაზრდა იურისტთა ასოციაციის თავჯდომარე, ანა ნაცვლიშვილი ე.წ. კაბელების საქმესთან დაკავშირებით, პროკურატურასთან გამართულ აქციაზე აკეთებს.

ნაცვლიშვილი მიიჩნევს, რომ აღნიშნულ საქმეში მთავარი განმსაზღვრელი არა სამართლებრივი და ფაქტობრივი გარემოებები, არამედ პოლიტიკური მოტივი იყო.

სამართლიანი არჩევნების წარმომადგენელი, ნინო ლომჯარია კი განმარტავს, რომ საქმეს მთელი რიგი სამართლებრივი ხარვეზები აქვს და რაც მთავარია, პროკურატურამ დანაშაულის ანგარებითი მოტივი ვერ დაადასტურა:

"ამიტომ მიმაჩნია, რომ ეს არის ერთ-ერთი საქმე, რომელიც ძალიან ცხადად წარმოადგენს სასამართლო სისტემაში დღეს არსებულ პოლიტიკურ გავლენებს და მის უარყოფით შედეგებს".

აქციაზე იმყოფებიან თავისუფალი დემოკრატების, ნაციონალური მოძრაობის, პაატა ბურჭულაძის პოლიტიკური მოძრაობისა და სხვა პარტიების წარმომადგენლები, მსჯავრდებულების ოჯახის წევრები და მათი მხარდამჭერები თბილისიდან და რეგიონებიდან.