ინფრასტრუქტურისა და მდგრადი განვითარების უკვე ყოფილმა მინისტრმა, მაია ცქიტიშვილმა განაცხადა, რომ ღარიბაშვილს გულწრფელად სთხოვა, მისცეს საშუალება, დაუბრუნდეს ოჯახს და გამოვიდეს აქტიური პოლიტიკური ცხოვრებიდან. ამის შესახებ მან მას შემდეგ ისაუბრა, რაც ცნობილი გახდა, რომ მინისტრის პოსტს ტოვებს.

"დიდი მადლობა ბატონო ირაკლი პირველ რიგში მადლობისთვის, ასეთ დაფასებისთვის. მე მინდა ვთქვა, რომ დღეს თქვით უკვე, ბოროტად ვისარგებლე იმით, რომ ბატონ ირაკლისთან ერთად, 15 წელია ვიცნობთ ერთმანეთს, ძალიან ბევრი ერთობლივად გაკეთებული საქმე გვაკავშირებს ჯერ კიდევ მაშინ, როდესაც ერთად ვმუშაობდით საერთაშორისო ფონდ ქართუში. მაშინ, როდესაც ბატონი ირაკლი იყო მთავრობის მეთაური, მოგეხსენებათ, რომ მე მას ვეხმარებოდი, როგორც მთავრობის ადმინისტრაციის ხელმძღვანელი და შესაბამისად, გულწრფელად ვთხოვე, რომ მომცეს საშუალება მე დავუბრუნდე ჩემს ოჯახს, გამოვიდე აქტიური პოლიტიკური ცხოვრებიდან და შესაბამისად, ის 9-წლიანი პერიოდი ჩემი ცხოვრების, ძალიან დატვირთული და საინტერესო დავასრულო ამით", — თქვა ცქიტიშვილმა ქართული ოცნების ოფისში გამართულ პრესკონფერენციაზე.

უკვე ყოფილმა მინისტრმა აღნიშნა, რომ პოლიტიკაში ყოფნის პირველი დღიდან იზიარებს ქართული ოცნების ფასეულობებს, სულისკვეთებას და ყოველთვის იქნება ქართული ოცნების მხარდამჭერი, "გულშემატკივარი იმ ხალხის, რომელიც ასე გულწრფელად და კარგად აკეთებს თავის საქმეს".

მაია ცქიტიშვილს მინისტრის პოსტზე მისი მოადგილე, ირაკლი ქარსელაძე ჩაანაცვლებს. დღესვე, ცნობილი გახდა, რომ თავდაცვის მინისტრიც ყოფილი მოადგილე, ჯუანშერ ბურჭულაძე გახდება. ჯამში, მთავრობაში ორი მინისტრი შეიცვალა. ისინი პარლამენტმა უნდა დაამტკიცოს.