სამეფო კარის თამაშების მეშვიდე სეზონის პრემიერა ზაფხულში, 25 ივნისს იგეგმება და როგორც ცნობილია ის ტრადიციული ათის ნაცვლად შვიდ ეპიზოდიანი იქნება.

არია სტარკის როლის შემსრულებელმა მეისი უილიამსმა ერთ-ერთ ინტერვიუში მეშვიდე სეზონის დეტალებზე ისაუბრა და თქვა, რომ ის აქამდე გადაღებულ სეზონებს შორის ყველაზე დაძაბული, საინტერესო და დამაინტრიგებელი იქნება.

"ჩვენ კულმინაციისკენ მივდივართ და ეს ძალიან საინტერესოა. მთელი სიცხადით შევიგრძნობ როგორი დიდებული და საინტერესო, არაორდინალურიც კი შეიძლება იყოს შოუს ფინალი. გულწრფელად ვამბობ, ჩვენ ახლა ყველაზე დამაინტრიგებელი, საინტერესო და დაძაბული სეზონის პრემიერისთვის ვემზადებით, იმაზე უფრო დიდებული ეპიზოდებისთვის ვიდრე აქამდე ყოფილა", - ამბობს მეისი.

მეშვიდე სეზონის პრემიერამდე Reddit-ის ერთ-ერთმა იუზერმა Game of Thrones-ის მეშვიდე სეზონის ყველა მომავალი სერიის მოკლე შინაარსი დადო, მოგვიანებით კი ფოტო სპოილერებიც გავრცელდა, სადაც ჩანს, რომ სამეფო კარის თამაშების მეშვიდე სეზონის ერთ-ერთი მთავარი ფიგურა ეურონ გრეიჯოი იქნება.

სერიალის მეექვსე სეზონი სერსეი ლანისტერის ტრიუმფალური აღზევებით დასრულდა, სწორედ ამიტომ ყველა მოუთმენლად ელის ლინა ჰედის პერსონაჟის მომავალს, რომელზეც თავად მსახიობმაც ისაუბრა და აღნიშნა, რომ სერსეი აუცილებლად გააკეთებს იმას, რაც მას დასჭირდება იმისთვის, რომ დარჩეს ძლიერ და ძალაუფლების მქონე პერსონაჟად.

სამეფო კარის თამაშების მომავალზე ჯორჯ მარტინმაც ისაუბრა და გაგვაფრთხილა, რომ ბედნიერი დასასრულის იმედი არ უნდა გვქონდეს.

ისღა დაგვრჩენია დაველოდოთ ზაფხულს და გავიგოთ როგორ გაგრძელდება ბრძოლა რკინის ტახტისთვის.