26 თებერვალს 12:00 დან 16:00-მდე, თბილისში მეტროსადგურ თავისუფლების მოედანთან ტყიბულელი მეშახტეების სოლიდარობის კამპანია გაიმართება. ამ პერიოდის განმავლობაში ორგანიზატორები მაღაროელებისათვის თანხას შეაგროვებენ. კამპანიისთვის Facebook-ში ღინისძიების გვერდი ორგანიზაცია ახალგაზრდა მწვანეების ორგანიზებით შეიქმნა.

ინიციატორების განცხადებით, ტყიბულში შექმნილი მდგომარეობა სცდილდება ლოკალურ საზღვრებს. მათივე თქმით, გარდა იდენტური პრობლემების მქონე სხვა ინდუსტრიული ქალაქებისა, ტყიბულში არსებული მძიმე სოციალური მდგომარეობა ვრცელდება მთელს საქართველოზე.

"შემოგვიერთდით პარასკევს თავისუფლების მოედანზე. გამოიტანეთ გასაყიდად ნივთები (ჩანთები, სტიკერები, ხელნკაკეთი აქსესუარები და სხვა).შემოსული თანხა მთლიანად გადაეცემა გაფიცულ მეშახტეებს. მხარში დავუდგეთ ტყიბულელ მუშებს ამ მნიშვნელოვან ეტაპზე, რათა შევქმნათ გამარჯვების პრეცედენტი. პრეცედენტი რომელიც ქვეყანაში ჩაგვრის ნებისმიერი გამოვლინების წინაღმდეგ ბრძოლის მაგალითი იქნება",-წერია ღონისძიების გვერდზე ორგანიზატორების მიმართვაში.

ტყიბულელი მეშახტეები 13 თებერვალს გაიფიცნენ და მათი მთავარი მოთხოვნა შრომის პირობების გაუმჯობესება და ხელფასის 40%-ით გაზრდაა.