ბევრს საუბრობენ სამყაროს აღსასრულზე, რომ შესაძლოა გლობალურმა დათბობამ დედამიწის ზედაპირი წყლით დაფაროს, ან ჩვენს პლანეტას ასტეროიდი დაეჯახოს და სამუდამოდ გააქროს. ეს რომ მართლა მოხდეს და ჩვენ ყველას მთვარეზე მოგვიწიოს გამგზავრება, ცხადია, მოყენებული ზიანის გადასატანად დიდი რაოდენობით ალკოჰოლი დაგვჭირდება, მაგრამ რამდენად არის შესაძლებელი ეს?

ჩვენდა საბედნიეროდ, მეცნიერები ამ საკითხზე უკვე ფიქრობენ და უახლოეს მომავალში გრანდიოზული ექსპერიმენტის ჩატარებას გეგმავენ. მათ აინტერესებთ რამდენად შესაძლებელია მთვარეზე ლუდის მოდუღება.

აღნიშნული ექსპერიმენტის იდეა სან დიეგოს უნივერსიტეტის სტუდენტებს ეკუთვნით, რომლებმაც არც ისე დიდი ხნის წინ Lab2Moon-ის კონკურსში გაიმარჯვეს. ექსპერიმენტის მიზანია შეამოწმოს როგორ მოქმედებს კოსმოსური ჰაერი საფუარზე, რათა მომავალში დადგინდეს შესაძლებელია თუ არა მთვარის პირობებში ფარმაცევტული პროდუქტებისა და საფუარის შემცველი საკვების მომზადება, მაგალითად პურის.

როგორც ექსპერიმენტის ავტორები ამბობენ, იდეა სიცილით-კისკისით გაჩნდა, თუმცა კარგად რომ დაფიქრდნენ, მიხვდნენ რომ საკაცობრიო საქმეს ეჭიდებოდნენ და სერიოზულად მიუდგნენ.

იმედია მეცნიერები წარმატებას მიაღწევენ და რამდენიმე ასწლეულის შემდეგ ჩეხური ან თუნდაც გერმანული ლუდით გამოთრობის შემდეგ ნილ არმსტრონგის ან NASA-ს სახელობის ლუდით გამოვალთ ნაბახუსევზე.