ინდოეთში უსახლკარო ბავშვებს განათლებასთან ხელმისაწვდომობის უდიდესი პრობლემა აქვთ, თუმცა ვისაც სწავლა სურს, მისთვის 45 წლის რაჯეშ შარმა არსებობს, რომელიც ბავშვებს ხიდის ქვეშ უფასო გაკვეთილებს უტარებს.

მართალია შარმა ვერც სკოლის ატესტატებს გასცემს და ვერც დიპლომებს, თუმცა მისი გაკვეთილები ძალიან სასარგებლოა ყველასთვის, ვისაც საბაზისო განათლების მიღება სურს.

ფოტო: Ahmer Khan

ინდოელი მამაკაცისთვის ინსპირაცია მისი განვლილი ცხოვრება აღმოჩნდა. როგორც გაირკვა, შარმას თავად მოუწია კოლეჯის მიტოვება ფინანსური პრობლემების გამო. ის ფიქრობს, რომ განათლების მიღება არ უნდა იყოს სოციალურ ფენასა და შემოსავლებზე დამოკიდებული, ამიტომ ცდილობს საკუთარი შრომით დაეხმაროს მათ, ვინც სკოლებში ვერ ახერხებს სიარულს.

რაჯეში გაკვეთილებს ყოველდღე დილის 9 საათიდან 12 საათამდე ატარებს და მეცადინეობებს 200-მდე მიუსაფარი ბავშვი ესწრება. სასწავლო კურიკულუმიც მის მიერ შედგენილია და როგორ თვითონ ამბობს, მხოლოდ იმ საგნებს ასწავლის, რაც ბავშვებს რეალურად გამოადგებათ ცხოვრებაში.

ინგლისური, ინდური ენა, მეცნიერება, მათემატიკა, ისტორია და გეოგრაფია. ეს იმ საგნების ჩამონათვალია, რომელსაც რაჯეში ბავშვებს ყოველდღე უტარებს.

გაკვეთილები ძალიან უშუალო გარემოში ტარდება. მოწაფეები და მასწავლებელი ხიდის ქვეშ იკრიბებიან, გზაზე ჩამოსხდებიან და ასე იწყება გაკვეთილის პროცესი. მათ არ აქვთ არც სპეციალური მერხები და სკამები.

როგორც ჩანს, მთავრობას რაჯეშის სკოლის მიმართ ინტერესი არ გამოუჩენია, თუმცა კეთილი ადამიანები შემოწირულობებით ეხმარებიან გმირ მასწავლებელს. ისინი წიგნებს, რვეულებს, ტანსაცმელს, ფეხსაცმელს, საჭმელსა და სხვადასხვა ნივთებს ჩუქნიან რაჯეშს, რომელიც მოსწავლეებს ყველაფერს თანაბრად უნაწილებს.

შაბათობით მოსწავლეები მასწავლებელთან ერთად ფეხბურთს, კრიკეტს, ბადმინტონს და სხვადასხვა თამაშებს თამაშობენ.

მოსწავლეები აღფრთოვანებულები არიან რაჯეშით და მისი სწავლების მეთოდით, რომელიც ბავშვებს საშუალებას აძლევს ისე გამოხატონ თავიანთი სათქმელი, როგორც მათთვის იქნება კომფორტული.

მაგალითად, 15 წლის მოწაფე აღნიშნავს, რომ მისი მასწავლებელი საშუალებას აძლევს ხატოს ყველაფერი, რაც მოესურვება და სწორედ ამის მიხედვით აფასებს მას.

ბავშვები ყოველდღიურად 2 და მეტ კილომეტრს ფეხით გადიან, რათა რაჯეშის გაკვეთილებს დაესწრონ.

თავად რაჯეში გაკვეთილების შემდეგ თავის სურსათის მაღაზიაში ბრუნდება და 10 საათამდე დაუღლელად მუშაობს.