პრეზიდენტის საპარლამენტო მდივანი, ანა დოლიძე ფარული მოსმენების საკითხზე შექმნილი სამუშაო ჯგუფის შეხვედრას დაესწრო. ამის შესახებ ინფორმაციას პრეზიდენტის პრესსამსახური ავრცელებს.

პრესსამსახურის ინფორმაციით, დოლიძე იმედოვნებს, რომ პარლამენტი ფარული მოსმენების საკითხზე კანონმდებლობის დახვეწისას ორ ფასეულობას - ადამიანის უფლებებსა და ქვეყნის უსაფრთხოების ინტერესს შორის სწორ ხაზს გაავლებს.

„საქართველოს პარლამენტი დადგა კონკრეტული რეალობის წინაშე, მან უნდა შეიმუშაოს ფარული მოსმენებისთვის ახალი მოდელი და ამ მოდელის შემუშავებისას უნდა დაიცვას ძალიან ფაქიზი ბალანსი - ადამიანის უფლებებსა და ქვეყნის უსაფრთხოების ინტერესებს შორის,“ - აღნიშნულია პრეზიდენტის პრესსამსახურის გავრცელებულ ინფორმაციაში.

დღეს ე.წ. ფარულ მოსმენებთან დაკავშირებით პარლამენტში პირველი შეხვედრა გაიმართა.