სტრატეგია აღმაშენებლის ლიდერი, გიორგი ვაშაძე ამბობს, რომ ქართული ოცნება და მისი თითოეული ლიდერი Deepfake-ია. ვაშაძე ამ განცხადებით მმართველი პარტიის აღმასრულებელს მდივანს, ირაკლი კობახიძეს ეხმაურება, რომელმაც თქვა რომ ოპოზიცია წინასაარჩევნოდ Deepfake-ების გამოყენებას გეგმავს.

"Deepfake, ანუ ღრმა სიყალბე თვითონ ქართული ოცნებაა, რომელსაც შანსი არ აქვს, რომ არჩევნებში 35%-ზე მეტი აიღოს. ასე რომ, ხელი აიღეთ ყოველგვარი გაყალბების მცდელობისგან, იმიტომ, რომ ამას ჩვენ არც ერთ შემთხვევაში არ დავუშვებთ", — ამბობს ვაშაძე.

ის ამომრჩეველს არჩევნებში მონაწილეობისკენ მოუწოდებს.

"თითოეულ მოქალაქეზე და ამომრჩეველზეა დამოკიდებული საქართველო აღმშენებლობას დაიწყებს, თუ კვლავ ამ დიდ სიყალბეში იქნება, ამ დიდ ფეიკში, რომელსაც ისინი რვა წელია ტირაჟირებენ. ქართული ოცნების თითოეული ლიდერი მართლაც დიფ ფეიკია, თვითონ გამდიდრდნენ, ხალხი კი გააღარიბეს", — განაცხადა გიორგი ვაშაძემ.

ქართული ოცნების აღმასრულებელმა მდივანმა, ირაკლი კობახიძემ განაცხადა, რომ "რადიკალური ოპოზიცია" Deepfake-ის გამოყენებით მასალებს ამზადებს, რაც, შესაძლოა, არჩევნების წინა დღეს ან არჩევნების დღეს გაავრცელონ.

გაიგეთ მეტი: