მინსკში სპეცრაზმმა ქალთა მარშში მონაწილე რამდენიმე ათეული ქალი დააკავა. ამის შესახებ ინფორმაცია გამოცემა MEDUZA-მ გაავრცელა.

მედიის ცნობით, მინსკში, თავისუფლების მოედანზე ათასამდე ადამიანი შეიკრიბა. მოგვიანებით პოლიციამ გააფრთხილა, რომ მათი შეკრება უკანონო იყო, თუმცა აქციის მონაწილეები არ დაიშალნენ. ამის შემდეგ კი სპეცრაზმმა და სამოქალაქო ფორმით შემოსილმა ძალოვანებმა ქალების დაკავება დაიწყეს. ქალები ძალოვანებს წინააღმდეგობას უწევდნენ და მათთვის ნიღბების ჩამოგლეჯას ცდილობდნენ.

ჯამში რამდენიმე ათეული ადამიანი დაიჭირეს, დანარჩენები კი მოედნიდან გაიყვანეს. ამის შემდეგ კი მსვლელობის მონაწილეებმა სხვა ქუჩებზე გადაინაცვლეს.

ქალთა მარში, რომლის მონაწილეთა უმრავლესობა ქალია, მინსკში უკვე სამი კვირაა შაბათობით იმართება. აქამდე, ისინი ამ მსვლელობას ძალადობისა და დაკავების გარეშე ატარებდნენ.