ცაგერის მუნიციპალიტეტის ორი სოფლის — ორბელისა და ლაჯანას შესასვლელში სპეციალური ბლოკპოსტები მოეწყო.

უწყებათშორისი საკოორდინაციო საბჭოს გადაწყვეტილებით, მაღალი ეპიდემიოლოგიური რისკის გამო, ორბელსა და ლაჯანაში შემსვლელ და გამომსვლელ ყველა მოქალაქეს ადგილზე ჩაუტარდება პირველადი თერმოსკრინინგი და ტესტირება.

შინაგან საქმეთა სამინისტროში აცხადებენ, რომ ცაგერის მუნიციპალიტეტის სოფლებში შესვლა-გამოსვლა არ იზღუდება და არ წესდება სხვა მკაცრი საკარანტინო შეზღუდვები.

თავდაპირველად, ცაგერის მერმა ავთანდილ უგრეხელიძემ On.ge-ს განუცხადა, რომ აღნიშნულ სოფლებში შესვლა-გამოსვლა დროებით შეიზღუდებოდა. მისივე თქმით, ყველა მოქალაქის ტესტირებისა და პასუხების მიღების შემდეგ კი, შეზღუდვას მოხსნიდნენ.