საქართველოში აშშ-ის ელჩის, კელი დეგნანის განცხადებით ამერიკის შეერთებული შტატები მიიჩნევს, რომ ბელარუსში სამართლიანი არჩევნები არ ჩატარდა.

"აშშ თვლის, რომ ბელარუსში თავისუფალი და სამართლიანი არჩევნები არ ჩატარებულა. მოვუწოდებთ ბელარუსის ხელისუფლებას, მშვიდობიან დემონსტრანტებს საკუთარი პროტესტის გამოხატვის საშუალება მისცეს", — განაცხადა კელი დეგნანმა ჟურნალისტებთან საუბრისას.

ლუკაშენკოს წინააღმდეგ და ხელახალი სამართლიანი არჩევნების მოთხოვნით მრავალათასიანი აქციები მინსკში დღემდე არ წყდება.

მასშტაბური საპროტესტო აქციები ქვეყნის ყველა ქალაქში მიმდინარეობს და გაფიცვებში ყველა მსხვილი საწარმოა ჩართული. პროტესტი მას შემდეგ დაიწყო, რაც საპრეზიდენტო არჩევნების დროს კვლავ ლუკაშენკოს გამარჯვების შესახებ შედეგები გამოქვეყნდა. ლუკაშენკო ქვეყანას 26 წელია მართავს.

ადგილობრივი მედიის ცნობით, აქციების მიმდინარეობისას პოლიციამ აქციის ათასობით მონაწილე დააკავა. გავრცელდა ინფორმაცია ორი დაღუპულის შესახებაც.