80-იანი წლების იტალიაში განვითარებული ამარელვებელი სასიყვარულო ისტორიის შემდეგ ლუკა გუადანინო ამჯერად ერთ-ერთი ყველაზე ცნობილი კრიმინალური დრამის, Scarface-ის თავისებურ ვერსიას შემოგვთავაზებს.

Call Me By Your Name-სა და I Am Love-ის რეჟისორი ახალ ფილმს Universal Pictures-სთვის გადაიღებს, მის სცენარზე კი ცნობილი რეჟისორები ძმები კოენები იმუშავებენ.

Scarface 1929 წელს გამოქვეყნებული რომანია, რომელიც ცნობილი განგსტერის ალ კაპონეს რეალური ცხოვრების შთაგონებით შეიქმნა. წიგნის მიხედვით ორი ეკრანიზაცია გადაიღეს: 1932 და 1983 წლებში. მათ შორის ყველასათვის კარგად ცნობილი ბრაიან დე პალმას მიერ გადაღებული 1983 წლის კინოსურათია, რომელშიც ალ პაჩინო და მიშელ პფაიფერი მონაწილეობენ.

ფოტო: Universal Pictures

ფილმის მომავალ ვერსიაში ამ ორივე ეკრანიზაციის ელემენტები იქნება გაერთიანებული და მისი სიუჟეტი ლოს-ანჯელესში განვითარდება.

ეს პირველი შემთხვევა არ არის, როცა ლუკა გუადანინო ცნობილი ფილმის რიმეიქს გვთავაზობს: მისი ჯერჯერობით ბოლო სრულმეტრაჟიანი ფილმი Suspiria, რომელიც 2018 წელს გამოვიდა, დარიო არჯენტოს ამავე სახელწოდების ცნობილი საშინელებათა ჟანრის კინოსურათის მიხედვით გადაიღო.

Scarface-ის თანამედროვე ვერსიასთან ერთად ეს წარმოშობით იტალიელი რეჟისორი ოსკარის ნომინანტი ფილმის Call Me by Your Name-ის გაგრძელებასა და HBO-ს ახალ სერიალზე We Are Who We Are მუშაობს.