ქეით ბლანშეტის ერთგულ გულშემატკივრებს უკვე შეუძლიათ დაიწყონ მზადება, რომ დიდი ალბათობით მალე ეკრანებზე მის კიდევ ერთ ყველასათვის დასამახსოვრებელ შესრულებას ვიხილავთ.

Variety-ის ცნობით, კინოკომპანია Lionsgate ცნობილ ვიდეოთამაშ Borderlands-ის მიხედვით ფილმს იღებს, რომელშიც ერთ-ერთი მთავარი პერსონაჟის — ლილითის როლს ქეით ბლანშეტი შეასრულებს. ჯერჯერობით ამ დეტალის შესახებ კომპანიას ოფიციალური ინფორმაცია არ გაუვრცელებია.

მომავალ ფილმს ელი როთი გადაიღებს, რომელიც 2002 წელს გამოსული საშინელებათა ჟანრის ფილმ Cabin Fever-ის რეჟისორია. მაყურებლები მას ასევე იცნობენ თავისი სამსახიობო კარიერითაც: 2009 წელს გამოსულ კვენტინ ტარანტინოს ცნობილ ფილმში უსახელო ნაბიჭვრები შესრულებული როლით.

ელი როთი და ბრედ პიტი ფილმში უსახელო ნაბიჭვრები

ფოტო: Universal Pictures

რაც შეეხება ფილმის სცენარს, მასზე კრეიგ მაზინი იმუშავებს, რომელმაც მანამდე HBO-ს გახმაურებული სერიალის ჩერნობილი სცენარი შექმნა და ემის ჯილდოც მიიღო.

Borderlands 2009 წელს გამოსული სამეცნიერო ფანტასტიკის ჟანრის ცნობილი თამაშია, რომელიც პლანეტა პანდორაზე განვითარებულ მოვლენებზე მოგვითხრობს.მსოფლიოში ამ თამაშების სერიის 57 მილიონი ერთეულია გაყიდული.

ლილითი კი, რომლის როლსაც, სავარაუდოდ, ქეით ბლანშეტი მოირგებს, ამ ფრენჩაიზის ერთ-ერთი მთავარი პროტაგონისტია: გალაქტიკაში დარჩენილი ერთ-ერთი ქალი იმ ექვსიდან, რომლებიც ზებუნებრივ ძალებს ფლობენ.

რამდენიმე დღის წინ ასევე ცნობილი გახდა, რომ Lionsgate ცნობილი დისტოპიური ჟანრის ფილმების სერიის — შიმშილის თამაშები — ახალ ნაწილზე მუშაობს. შესაბამისად, დარწმუნებით შეგვიძლია ვთქვათ, რომ ეს კომპანია მაყურებლებს ერთმანეთზე უფრო საინტერესო და ამბიციურ პროექტებს უმზადებს მომავალში.