ავსტრალიელ წყვილს, რომელმაც სამი შვილი დაკარგა მალაიზიური ავიახაზების თვითმფრინავის MH17-ის ჩამოგდების შემდეგ, ბავშვი შეეძინა. ინფორმაციას CNN ავრცელებს.

მარიტა ნორისისა და ანტონი მესლინის პატარა გოგო 10 მაისს დაიბადა. მას ვაიოლეტი დაარქვეს. მშობლების თქმით, ბავშვმა მათ სიყვარული, სინათლე, იმედი და მხიარულება დაუბრუნა:

"გვჯერა, რომ ეს საჩუქარი ჩვენმა შვილებმა გამოგვიგზავნეს. ვაიოლეტის დაბადება ამტკიცებს ჩვენს რწმენას, რომ სიყვარული სიძულვილზე უფრო ძლიერია".

მარცხნიდან მარჯვნივ: მო, ევი და ოტისი.

ფოტო: მესლინების ოჯახი

წყვილის სამი შვილი, მო, ევი და ოტის მესლინი 2014 წლის ივლისში, უკრაინაში ჩამოგდებული თვითმფრინავის ბორტზე ბაბუასთან ერთად იყვნენ.

სამგზავრო თვითმფრინავი, რომელიც რეისს ამსტერდამიდან კუალა ლუმპურისკენ ასრულებდა, რუსი სამხედროების მიერ მხარდაჭერილი უკრაინელი სეპარატისტების მიერ კონტროლირებად ტერიტორიაზე ჩამოაგდეს.