კორონავირუსის გავრცელების პრევენციის გამო წელს არაერთი ცნობილი კინოფესტივალი გადაიდო გაურკვეველი ვადით ან მთლიანად გაუქმდა, თუმცა ტრიბეკას ფესტივალი ის ერთ-ერთი პირველია, რომელმაც შექმნილ მდგომარეობაშიც იპოვა გამოსავალი.

We Are One: A Global Film Festival (ჩვენ ერთნი ვართ: გლობალური კინოფესტივალი) — ასე ჰქვია წლევანდელ ტრიბეკას ფესტივალს, რომელიც ონლაინ YouTube-ზე გაიმართება და მისგან შემოსული თანხა მსოფლიო ჯანდაცვის ორგანიზაციასა და იმ სხვადასხვა საქველმოქმედო კომპანიებს გადაერიცხებათ, რომლებიც პანდემიისგან გამოწვეული ზიანის შემცირებას ცდილობენ.

ფესტივალი YouTube-ის ამ არხზე 29 მაისს დაიწყება და მასზე თვალის მიდევნება ნებისმიერ მსურველს სრულიად უფასოდ შეეძლება. ტრიბეკას წლევანდელ ონლაინ ფესტივალზე ვიხილავთ იმ მხატვრულ, დოკუმენტურ და მოკლემეტრაჟიან ფილმებს, რომლებიც ასევე ისეთი ცნობილი ფესტივალების პროგრამაში, იყო გათვალისწინებული როგორებიცაა ბერლინის, კანის, ვენეციისა თუ ლონდონის კინოფესტივალები.

"ხშირად ვამბობთ, რომ კინოს საზღვრებისა და განსხვავებების მიუხედავად ადამიანების გაერთიანებასა და მსოფლიოს განკურნებაში წარმოუდგენლად დიდი წვლილი შეაქვს. მსოფლიოს ყველა კუთხეში კი ახლა ეს ყველაზე მეტად სჭირდებათ", — განაცხადა ფესტივალის თანადამფუძნებელმა ჯეინ როზენთალმა.

YouTube-ის წარმომადგენელმა კი ხაზი გაუსვა ამ ღონისძიების უნიკალურობას:

"მსგავსი რამ არასდროს მომხდარა და ვამაყობთ, რომ სწორედ ჩვენ ვმასპინძლობთ ამ ღონისძიებას: კინოს გულმხურვალე ფანებს მთელი მსოფლიოდან ამ ფანტასტიკური ფილმების ნახვა ჩვენს პლატფორმაზე სრულიად უფასოდ შეეძლებათ", — განაცხადა რობერტ კინსლმა, კომპანიის უფროსმა ბიზნესოფიცერმა.

We Are One: A Global Film Festival 29 მაისს დაიწყება და 7 ივნისამდე მაყურებლებს ათი დღის განმავლობაში კინოფესტივალისთვის დამახასიათებელ სრულყოფილ სეანსებს შესთავაზებს.

კინოფესტივალის სრული პროგრამა მაისში გახდება ცნობილი.

ტრიბეკას კინოფესტივალი 2002 წელს ნიუ-იორკში დაარსდა და მას შემდეგ ის ერთ-ერთი ყველაზე ცნობილი თანამედროვე ამერიკული კინოფესტივალია, რომელზეც ყოველწლიურად 1 500-მდე ფილმს აჩვენებენ.