ლელო ძლიერი საქართველოს წევრის, ფიქრია ჩიხრაძის განცხადებით, განათლების ახალი რეფორმის ფარგლებში გამოქვეყნებული ისტორიის სახელმძღვანელო "გაძეძგილია ფაქტობრივი შეცდომებითა და გამიზნულად გამრუდებული შეფასებებით", ხოლო "რუსული მთავრობა საქართველოს ისტორიას აყალბებს".

როგორც მან აღნიშნა, განსაკუთრებით საგანგაშოა გეორგიევსკის ტრაქტატზე აბსოლუტურად არაობიექტური და რუსული პროპაგანდისთვის დამახასიათებელი შეფასებები, რადგან "ეს ხდება იმ ფონზე, როდესაც გეორგიევსკის ტრაქტატის თემა თავად ირაკლი კობახიძემ და რუსულმა პროპაგანდამ გაააქტიურეს".

ძველ სახელმძღვანელოში ივანე ჯავახიშვილის მოსაზრებით ტრაქტატი უარყოფითად იყო შეფასებული და "1783 წ. 24 ივლისის ხელშეკრულებას საქართველოსთვის სარგებლობა არა მოუტანია რა. ზიანი კი — აუარებელი. პოლიტიკური მდგომარეობა გაუმჯობესების მაგიერ საშინლად გაუარესდა", ახალ ვერსიაში ეს მოსაზრება გამქრალია და ვკითხულობთ პოლიტიკურად ამოტრიალებულ შეფასებას, "რომ ტრაქტატმა უზრუნველყო ქართველი ერის გადარჩენა.

სახელმძღვანელოს ამ ნაწილში არ აღმოჩნდა არც ერთი საეკლესიო მოღვაწე, არც ძველი პერიოდიდან და არც ულმობელი საბჭოთა რეპრესიების დროიდან, არადა, თითქოს სახელმძღვანელოს მთავარ ღირებულებით საყრდენად - ენა, მამული, სარწმუნოებაა - გამოცხადებული", — განაცხადა ჩიხრაძემ.

ჩიხრაძის განცხადებით, სახელმძღვანელოში უამრავი ფაქტობრივი შეცდომაა, მათ შორის:

"საქართველოს ეროვნული მოძრაობისა და პირველი პრეზიდენტის, ზვიად გამსახურდიას მოღვაწეობის შესახებ: კერძოდ, მერაბ კოსტავას და ზვიად გამსახურდიას მიერ 1956 წელს გავრცელებული პროკლამაციების შინაარსი და მათი გავრცელების მიზეზები.

დავით აღმაშენებლის ეპოქაზე: არ არის დეტალური ინფორმაცია მის რეფორმებზე, თურქ-სელჩუკების დასუსტებაში ჯვაროსნული ლაშქრობების როლზე, მისი და გიორგი II-ის პოლიტიკაში არსებულ განსხვავებებზე.

არაფერია ნათქვამი გიორგი სააკაძის სამხედრო წარმატებებზე, მის კონტრავერსიულ ნაბიჯებზე და დაპირისპირებაზე მეფე თეიმურაზთან", — ამბობს პოლიტიკოსი.

ჩიხრაძის მტკიცებით, "არ შეიძლება ახალმა თაობებმა არ იცოდნენ რა გაუკეთა რუსეთმა საქართველოს 2 საუკუნეზე მეტი ხნის განმავლობაში: ოკუპაცია, მოტყუება, დამცირება, სამეფო ტახტის და ეკლესიის ავტოკეფალიის გაუქმება, საქართველოს მართლმადიდებელ ეკლესიასთან მუდმივი ბრძოლა"

ოპოზიციონერმა პოლიტიკოსმა ასევე განაცხადა, რომ სახელმძღვანელოები ქართულ ოცნებასთან აფილირებულმა ადამიანებმა შექმნეს და ეს შესაძლებლობა "პირდაპირ გამოიყენეს პარტიული ნარატივების სახელმძღვანელოებში გადმოსატანად", ხოლო ალტერნატიული სახელმძღვანელოებით სწავლების შესაძლებლობა მთლიანად გაქრა.