ლელოს საქართველოსთვის ერთ-ერთი ლიდერის, ბადრი ჯაფარიძის თქმით, საქართველოს ეკონომიკას კორონავირუსის გამო შექმნილი კრიზისიდან გამოსასვლელად 6 მილიარდი დასჭირდება. ამის შესახებ მან ანტიკრიზისულ გეგმაზე საუბრისას განაცხადა.

"ნებისმიერ ეკონომიკურ ნაბიჯს უნდა ჰქონდეს მიზანი, რომ შევინარჩუნოთ სამუშაო ადგილები, სამწუხაროდ, უკვე ბევრმა დაკარგა. ვფიქრობთ, აუცილებელი იქნება 3 მილიარდი ლარის საგარანტიო ფონდის შექმნა სახელმწიფოს მიერ. მცირე და საშუალო ბიზნესის დაკრედიტება აქტიურად უნდა გაგრძელდეს, რომ მათ კრიზისული მდგომარეობიდან გამოსვლა შეძლონ. ასევე, ჩვენ ვფიქრობთ, 1 მილიარდი ლარის მოცულობის რესურსი უნდა გამოიყოს იმისათვის, რომ ვისაც ყველაზე ცუდად შეეხო ეს პროცესები, იმას დაეხმაროს სახელმწიფო," — განაცხადა ბადრი ჯაფარიძემ.

ჯაფარიძემ ლარის კურსზეც ისაუბრა და თქვა, რომ 300 მილიონი დოლარის ბაზარზე გატანა გონივრულ ვადებში საკმარისი იქნება იმისთვის, რომ შემდეგი სამი თვის განმავლობაში დადგენილი დერეფნის ფარგლებში ლარის კურსის ცვლილება მოხდეს. ეს იძლევა სტაბილურობის განცდას.

"ჩვენი რეკომენდაცია იქნება, სამი თვის განმავლობაში, განსაკუთრებით ამ პერიოდში, როდესაც პანდემიასთან აქტიური ბრძოლა მიმდინარეობს, ეროვნულმა ბანკმა შემოიღოს ლარის კურსის დერეფანი, ანუ ზედა და ქვედა ზღვარი, რაც ადამიანებს მისცემს საშულებას, ჰქონდეთ განცდა, რომ ლარის კურსი არ გასცდება ამ საზღვრებს და აღარ იქნება პანიკური მოთხოვნა დოლარის შეძენაზე", — განაცხადა ჯაფარიძემ.

ასევე, ჯაფარიძის თქმით, აუცილებელია სასურსათო უსაფრთხოების უზრუნველყოფა.

"ამ მიზნით, საჭიროა სახელმწიფომ ხელი შეუწყოს, რომ ყველა ნაკვეთი, ყველა მიწა იქნას დამუშავებული, შეიქმნას ყველა მასტიმულირებელი მექანიზმი იმისთვის, რომ არ დარჩეს არცერთი ნიადაგი, სავარგული დაუმუშავებელი და საქართველომ შექმნას თავისი სასურსათო უსაფრთხოება," — განაცხადა ბადრი ჯაფარიძემ.