26-მა ევროპარლამენტარმა საქართველოს მთავრობას და პრემიერ-მინისტრ გიორგი გახარიას მორიგი კრიტიკული წერილი გამოუგზავნა. წერილის ასლი ევროპული საქართველოს დეპუტატმა, გიორგი კანდელაკმა ფეისბუქზე გაავრცელა. მანამდე ამის შესახებ ნეტგაზეთმა დაწერა. გამოცემის ინფორმაციით, წერილი ევროპარლამენტარმა მიაწოდათ.

"როგორც საქართველოს ნამდვილმა მოკავშირეებმა, ჩვენ, ევროპარლამენტის წევრებმა უნდა გამოვხატოთ შეწუხება საქართველოს უკუსვლით კანონის უზენასობისა და დემოკრატიული პრინციპების მიმართულებით", — წერენ ევროპარლამენტარი.

ისინი წუხილს გამოთქვამენ პროპორციული საარჩევნო სისტემის კანონპროექტის ჩაგდების გამო და შეშფოთებას გამოთქვამენ, რომ ამაში წვლილი მმართველმა გუნდმა შეიტანა. ისინი მოუწოდებენ საქართველოს მთავრობას, რომ ყოველგვარი გადადების გარეშე მოამზადონ ცვლილებები პროპორციულ საარჩევნო სისტემაზე გადასასვლელად.

წერილში ევროპარლამენტარები გმობენ საპროტესტო აქციებზე მომიტინგეების წინააღმდეგ არაპროპორციული ძალის გამოყენებას. მათი თქმით, მიუღებელია ზედმეტი ძალის გამოყენება პროტესტის დაშლის დროს.

გარდა ამისა, ევროპარლამენტარები აცხადებენ, რომ უზენაესი სასამართლოს მოსამართლეების დანიშვნა მოკლებული იყო გამჭვირვალობასა და ობიექტურობას. მათი თქმით, პარლამენტმა უნდა უზრუნველყოს, რომ მოსამართლეები აკმაყოფილებდნენ როგორც პროფესიონალურ, ისე რეპუტაციულ სტანდარტებს.

ევროპარლამენტარები პოლიტიკოსების პატიმრობასაც ეხმაურებიან. მათი თქმით, გიგი უგულავას საქმე აჩენს კითხვებს პროცედურებსა და უზენაესი სასამართლოს ინტერესებზე.

"პოლიტიკური გავლენა სასამართლოზე მზარდი ჩანს იმის გათვალისწინებით, რომ მმართველი პარტიის თავმჯდომარე ოპოზიციას ციხით დაემუქრა და განახლდა ძველი საქმეები ოპოზიციის რამდენიმე ლიდერის წინაღმდეგ, რამდენიმე კი დააპატიმრეს", — წერენ ისინი.

ევროპარლამენტარები ფეისბუქის მიერ ხელისუფლებასთან ასოცირებული ფეისბუქგვერდების დაბლოკვასაც აფასებენ. მათი თქმით, ყოველთვის ჰქონდათ იმედი, რომ საქართველო ჰიბრიდული ომის წინააღმდეგ მათი პარტნიორი იყო, ამიტომ ეს ინფორმაცია განსაკუთრებით იმედგაცრუებას იწვევს.

წერილის დასასრულს ევროპარლამენტარები მოუწოდებენ საქართველოს მთავრობას, რომ მათი კრიტიკა სერიოზულად განიხილოს ქართველი ხალხის კეთილდღეობისთვის. მათი თქმით, მზად არიან საქართველოს მხარი დაუჭირონ დემოკრატიის შენებაში.

ქართული ოცნების გენერალურმა მდივანმა და თბილისის მერმა, კახა კალაძემ ჟურნალისტების კითხვას ევროპარლამენტარების კრიტიკის შესახებ ირონიულად უპასუხა. კრიტიკას იმაზე, რომ საქართველოში კანონის უზენაესობისა და დემოკრატიული განვითარების კუთხით უკუსვლა შეინიშნება, კალაძე პასუხობს:

"2012 წლამდე იყო წინსვლა და ახლა გვაქვს უკუსვლა".

კალაძის თქმით, მას ევროპარლამენტარის განცხადება არ უნახავს, თუმცა ჟურნალისტის დამაზუსტებელ კითხვაზე, მცდარია თუ არა ევროპარლამენტარების მსგავსი მოსაზრება, პასუხობს — მცდარია.

ბოლო ორი თვეში საქართველოს მთავრობამ აშშ-დან კონგრესმენებისა და სენატორების, ასევე, ევროპარლამენტარების კრიტიკული წერილები მიიღო. წერილებში იყო გამოთქმული შეშფოთება მიმდინარე მოვლენების, აქციების დაშლის, პროპორციული სისტემის ჩაგდების და ოპოზიციონერი პოლიტიკოსების დევნის გამო. აშშ-დან მიღებულ წერილებში აღნიშნული იყო, რომ საქართველოსა და ამერიკის პარტნიორობა შესაძლოა კითხვის ნიშნის ქვეშ დადგეს და განიხილება სანქციების საკითხი. ევროპარლამენტარები კი ამბობდნენ, რომ საქართველომ დემოკრატიის გზას არ უნდა გადაუხვიოს.