თანატოლების სასტიკი დაცინვა 11 წლის ბეთანი ტომპსონისთვის იმდენად აუტანელი გახდა, რომ მან თავი მოიკლა. დედამისის თქმით, გოგონას "გამრუდებული" ღიმილისთვის დასცინოდნენ.

ბეთანი 3 წლის იყო, როდესაც ტვინის სიმსივნის დიაგნოზი დაუსვეს. ის წლების განმავლობაში ებრძოდა დაავადებას და სხივური თერაპიით მკურნალობდა.

2008 წელს ბეთანი დაავადებისგან გათავისუფლდა, თუმცა მკურნალობის პროცესში მას სახის ნერვი დაუზიანდა, რამაც ღიმილი შეუცვალა. "ეს და მისი ხვეული თმა გახდა ბულინგის მიზეზი" - უთხრა ბეთანის დედამ, ვენდი ფეჩტიმ CNN-ს.

ფოტო: ტომპსონების ოჯახი

ვენდი ფეჩტის განცხადებით, თვითმკვლელობის დღეს ბეთანიმ თავის მეგობარს უთხრა, რომ მეტის ატანას აღარ აპირებდა და თავს მოიკლავდა. მოგვიანებით მეგობრის მამამ ბეთანის ოჯახში დარეკა, მაგრამ უკვე გვიანი იყო. შინ მისულმა ბეთანიმ მამინაცვლის იარაღი მოძებნა და თავი მოიკლა.

ფეჩტის თქმით, მათ იარაღი დამალული ჰქონდათ, თუმცა ბეთანიმ ის მაშინ იპოვა, როცა მამინაცვალს თავის ოთახში ეძინა.

სკოლის წარმომადგენლები აღიარებენ, რომ მათთვის ბულინგის ფაქტის შესახებ ცნობილი იყო, თუმცა სათანადო ზომები ვერ მიიღეს.

"სკოლის სისტემა შესაცვლელია, თუმცა მეც ყოველ საღამოს უნდა დამერეკა იმ ბავშვების მშობლებისთვის, რომლებიც ჩემს შვილს დასცინოდნენ. იქნებ საბოლოოდ დაღლილიყვნენ ჩემი ზარებით და მიეღოთ ზომები", - ამბობს ვენდი ფეტჩი.

როგორც ცნობილია, ბეთანის სიცოცხლის ბოლო დღეს ის და მისი მეგობარი სკოლაში ანტი-ბულინგის შინაარსის პოსტერებით მივიდნენ, თუმცა სკოლის ადმინისტრაციამ მოსწავლეებს მათი გაკვრის უფლება არ მისცა.

ადგილობრივი მოსახლეობა აპირებს ოჯახს ბეთანის დაკრძალვის თანხა შეუგროვოს. მეგობრების ამბობენ, რომ ბეთანი მოსიყვარულე და მზრუნველი გოგო იყო, უყვარდა ცურვა, ცხოველები და მუსიკის მოსმენა.