20 ივნისის აქციის დაშლის საქმეზე ბრალდებული მორის მაჩალიკაშვილი გაათავისუფლეს. ბრალდების მხარემ მასთან საპროცესო შეთანხმება გააფორმა. მან სხდომაზე ბრალი აღიარა.

როგორც ადვოკატმა მარიამ კუბლაშვილმა On.ge-ს უთხრა, მაჩალიკაშვილმა აღიარა ბრალი, მაგრამ არა — მოტივი. მისივე თქმით, მაჩალიკაშვილმა აღიარა, რომ კადრებში ნამდვილად ჩანს და ძალადობაში მონაწილეობდა.

დღეს, 6 თებერვლის სხდომაზე თბილისის საქალაქო სასამართლომ მხარეთა შორის მიღწეული საპროცესო შეთანხმება დაამტკიცა და ბრალდებულ მორის მაჩალიკაშვილს 2-წლიანი პირობითი მსჯავრი განესაზღვრა.

მორის მაჩალიკაშვილს ბრალი სისხლის სამართლის კოდექსის 225-ე მუხლის პირველი და მეორე ნაწილების საფუძველზე აქვს წაყენებული. ეს მუხლები ჯგუფური ძალადობის ორგანიზებას, ხელმძღვანელობასა და მასში მონაწილეობას გულისხმობს და ექვსიდან ცხრა წლამდე პატიმრობას ითვალისწინებს.

16 სექტემბერს 20 ივნისის საქმეზე ერთ-ერთ დაკავებულს, სოსო ბაჯელიძეს აღკვეთი ღონისძიება პატიმრობა 5 000-ლარიანი გირაოთი შეეცვალა. გარდა ამისა, გამოძიების დასრულებამდე მას ქვეყნის დატოვება აეკრძალა.

20-21 ივნისის მოვლენებს საქართველოს პროკურატურა სახელმწიფო გადატრიალების მუხლით იძიებს. 20 ივნისის საქმეზე ამ დრომდე 20-მდე პირია პასუხისგებაში მიცემული.