თიბისის საქმეზე მიმდინარე არსებით განხილვისას დაცვის მხარემ მოსამართლე გიორგი არევაძის აცილების შუამდგომლობა დააყენა, თუმცა არ დაკმაყოფილდა. დღეს, 3 თებერვლის სხდომაზე მოსამართლემ განმარტა, რომ არ არსებობს მის ობიექტურობასა და მიუკერძოებლობაში ეჭვის შეტანის საფუძველი.

"ქართული სასამართლოს, თითქმის 30-წლიან ისტორიაში, არცერთ სისხლის სამართლის საქმეზე მსგავსი ფორსირებული პროცესები არ ჩანიშნულა. როგორც ჩანს, ჩვენ ვართ ყველაზე მძიმე დამნაშავეები ამ 30 წლის განმავლობაში. აქვე აღვნიშნავ, რომ ამ საქმეში აღკვეთის ღონისძიების სახით პატიმრობა გამოყენებული არ არის, შესაბამისად, სასამართლოს არ აქვს მკაცრად განსაზღვრული დრო საქმის დასამთავრებლად", — განაცხადა მამუკა ხაზარაძემ და მოსამართლეს დაუსვა კითხვა, თუ რატომ ჩქარობს მოსამართლე და უკავშირდება თუ არა ეს არჩევნებსა და პარტია ლელოს.

მამუკა ხაზარაძისა და ბადრი ჯაფარიძის ადვოკატმა, ზვიად კორძაძემ სხდომის გადადებაც ითხოვა, თუმცა მოსამართლე არევაძემ არც ეს შუამდგომლობა არ დააკმაყოფილა. კორძაძის თქმით, პროკურატურა მათივე განცხადების საფუძველზე სწავლობს, შეხვდა თუ არა მოსამართლე პრემიერ გიორგი გახარიას გახმაურებულ საქმეებთან დაკავშირებით.

მოსამართლე გიორგი არევაძე განიხილავდა ნიკა გვარამიას საქმესაც, თუმცა 10 იანვრის სხდომაზე მან ეს საქმე აიცილა. გვარამიას თქმით, მოსამართლე არევაძე იანვარში ბევრ პროცესს ნიშნავდა, რაც მისთვის და მისი ადვოკატებისთვის მიუღებელია:

"ეს კაცი ამ პროცესის ორ-სამ თვეში მორჩენას აპირებს, გასაგებია რითი. მე საერთოდ არ ვიცოდი ვინ იყო მოსამართლე. ეს არის მოსამართლე, რომელიც იხილავს თიბისის საქმეს. და ჩემი სახელით და მამუკა ხაზარაძის და დანარჩენი ადამიანების, ვის ციხეში ჩასმასაც აპირებს, რომ ციხეში მოხვდება ის, გიორგი არევაძე და ხელიხელჩაკიდებული ჩაჯდება კამერაში იმ პროკურორთან ერთად, რომელიც აქ ზის და თიბისის საქმეზე უზის საპროკურორო სკამზე", — განაცხადა ნიკა გვარამიამ.