ახალგაზრდა იურისტთა ასოციაციის თქმით, არჩევნები მშვიდ გარემოში მიმდინარეობს, თუმცა გამოვლინდა შემდეგი დარღვევები: მუქარა და დამკვირვებლებისთვის უფლებების შეზღუდვის ფაქტები, დამკვირვებლებთან სამკერდე ნიშნების სიზუსტის პრობლემა და პროცედურული ხასიათის სხვა დარღვევები. ის ამბობს, რომ საიამ ამ დროისთვის 33 საჩივარი და 25 შენიშვნა დაწერა.

საიას თავჯდომარე, ანა ნაცვლიშვილი ამბობს, რომ სხვადასხვა საარჩევნო უბნის ტერიტორიაზე კვლავ დგანან კოორდინატორები, რომლებიც მისულსა და არმისულ ამომრჩეველს აღრიცხავენ. ის ამბობს, რომ ეს ადამიანები ამომრჩევლის ნების გამოხატვაზე ირიბ გავლენას ახდენენ.

"გორის 44-ე უბანზე ორგანიზაციის - ახალგაზრდები ევროპული მომავლისთვის წარმომადგენელი, რომელიც ენმ-ს აქტივისტია დაემუქრა საიას დამკვირვებელს. მან გააკრიტიკა ჩვენი დამკვირვებელი ჩვენ მიერ დაწერილი საჩივრის გამო, რომელიც ეხებოდა წილისყრის პროცედურაში თვითნებურად მონაწილეობის არმიღება, რაც უკანონო ქცევაა.

თელავის მე-13 უბანზე საუბნო კომისიას უბნიდან გამოაძევა ჩვენი დამკვირვებელი. კომისიამ განმარტა, რომ დამკვირვებელი ზედმეტად აქტიურობდა და ხელს უშლიდა კომისიას უფლება-მოსილებებბის განხორციელებაში. ეს მოჰყვა იმ ფაქტს, როდესაც ჩვენმა დამკვირვებელმა უბანზე უკანონო ქმედება დააფიქსირა და ამასთან დაკავშირებით საჩივარი დაწერა".

საიას თავჯდომარე, ანა ნაცვლიშვილი ამბობს, რომ დამკვირვებლებისთვის ხელის შეშლა და მუქარა მიუღებელია:

"ჩვენ მოვუწოდებთ, როგორც კომისიის წევრებს, ასევე პოლიტიკური სუბიექტების წარმომადგენლებს და ხელმძღვანელ პირებს, თავიანთ წარმომადგენლებს მიაწოდონ სწორი მესიჯები, როგორ უნდა ჰქონოდეთ მათ კომუნიკაცია მოქალაქეებთან, დამკვირვებლებთან კომისიის წევრებთან".