აუდიტორია 115-ის წარმომადგენელმა, ლევან ლორთქიფანიძემ On.ge-სთან საუბარში განმარტა, რომ აუდიტორია 115-ის იურისტთა ჯგუფმა, ახალგაზრდა იურისტთა ასოციაციასთან ერთად, იმ საკონსტიტუციო სარჩელზე მუშაობა, რომელიც უახლოეს დღეებში სასამართლოში უნდა შეიტანონ, უკვე დაასრულა.

ლორთქიფანიძის განმარტებით, სტუდენტური მოძრაობისა და საიას იურისტები აღნიშნულ სარჩელზე უკვე ორი კვირაა მუშაობენ და ის უმაღლესი განათლების შესახებ კანონში ცვლილების შეტანას გულისხმობს:

"45-ე მუხლის მიხედვით ფაკულტეტის საბჭოს წევრი ხდება ადამიანი არა პირდაპირი კენჭისყრით, არამედ მან ჯერ კენჭი თვითმმართველობაში უნდა იყაროს და თვითმმართველობა გააგზავნის წევრებს ამ საფაკულტეტო საბჭოში. ჩვენ ვწერთ, რომ ეს არღვევს თანასწორი და დემოკრატიული არჩვენების საკონსტიტუციო პრინციპს".

როგორც თავად აუდიტორია 115-ის იურისტთა ჯგუფის წარმომადგენელმა, ირაკლი კუპრაძემ განგვიმარტა, გარდა 45-ე მუხლისა, შემუშავებული სარჩელით ცვლილებები უმაღლესი განათლების შესახებ კანონის 20-ე და 27-ე მუხლებშიც უნდა შევიდეს, რომელთაგან პირველი აკადემიური საბჭოს არჩევის წესს განსაზღვრავს, მეორე კი ძირითადი საგანმანათლებლო ერთეულსა და ძირითადი საგანმანათლებლო ერთეულის საბჭოს ეხება.

რაც შეეხება 45-ე მუხლს, ის უმაღლეს საგანმანათლებლო დაწესებულებაში თვითმმართველობის არჩევას კენჭისყრით, პირდაპირი არჩევნების საშუალებით ითვალისწინებს, რომელიც შემდეგ, თავისი დებულების შესაბამისად, ირჩევს წარმომადგენლებს ძირითადი საგანმანათლებლო ერთეულის საბჭოში.

ლორთქიფანიძის განმარტებით, ამ ეტაპზე უცნობია აუდიტორია 115-ის, პრემიერ მინიტრისა და განათლების მინისტრის შეხვედრა კონრეტულად როდის შედგება. თუმცა, მისი თქმით, სტუდენტური მოძრაობის წევრები პრემიერის აპარატს ელექტრონული ფოსტით რამდენიმე დღის წინ დაუკავშირდნენ:

"გვითხრეს, რომ განათლების მინისტრი წასულია და ჩვენ უკვე ვიმუშავეთ რაღაცებზეო. ალბათ მომავალ კვირას ან ამ კვირის ბოლოს შეგხვდებითო".

23 აპრილს აუდიტორია 115-ის წევრები პრემიერ მინისტრს, გიორგი კვირიკაშვილსა და განათლების მინისტრს, თამარ სანიკიძეს შეხვდნენ. შედეგად გადაწყდა, რომ უახლოეს მომავალში პრემიერის აპარატის, განათლების სამინისტროსა და აუდიტორია 115-ის წევრების წარმომადგენლობითი ჯგუფი იმ საკანონმდებლო ინიციატივაზე მუშაობას დაიწყებენ, რომელშიც სტუდენტების მიერ წამოჭრილ საკითხებთან დაკავშირებული ცვლილებები შევა.