პრემიერ-მინისტრ გიორგი გახარიას განცხადებით, ომით დაკარგული ტერიტორიები "შრომითა და მშვიდობით" უნდა აღდგეს. მისივე თქმით, საოკუპაციო ხაზთან ქართული მხარის ყველა რეაქცია საერთაშორისო პარტნიორებთან იქნება შეთანხმებული. ასე გამოეხმაურა პრემიერი შს მინისტრის ვახტანგ გომელაურის განცხადებას, რომ თუკი საოკუპაციო რეჟიმი ცეცხლს გახსნის, ისინიც უპასუხებენ:

"მე არაერთხელ მითქვამს, რომ ჩვენი ტერიტორიული მთლიანობის აღდგენა უნდა მოხდეს ჩვენი ყოველდღიური შრომით... ჩვენ ჩვენი ტერიტორიები რაც დავკარგეთ ომით, უნდა აღვიდგინოთ შრომით და მშვიდობით. ყველა ის გამოწვევა, რომელსაც ჩვენი მოქალაქეები ყოველდღე ხვდებიან, ყველა ამ ნაბიჯზე ჩვენი პასუხი იქნება პრაგმატული, ცივი გონებით და რაც მთავარია მშვიდობიანი".

შინაგან საქმეთა მინისტრმა ვახტანგ გომელაურმა პრემიერისგან განსხვავებით თქვა, რომ თუკი დე ფაქტო რეჟიმი ცეცხლს გახსნის, მისივე მტკიცებით, საქართველო მზადაა საპასუხო ქმედებისთვის. ამის შესახებ მან დღეს, 26 ოქტომბერს ჟურნალისტებთან საუბრისას თქვა.

აჭარაში ნატოს გემების შემოსვლის პარალელურად, ოკუპირებულ ცხინვალში "სასწავლო მიზნებით" საბრძოლო რეჟიმი გამოცხადდა. ინფორმაციას ამის შესახებ დე ფაქტო სამხრეთ ოსეთის საინფორმაციო სააგენტო ავრცელებს.

ბრძანება ამის შესახებ დე ფაქტო თავდაცვის მინისტრმა, იბრაჰიმ ჰასაევმა გასცა. დე ფაქტო უწყების განცხადებით, მათი მიზანია შეამოწმონ რამდენად მზად არის სამხედრო განყოფილება, რომ შეასრულოს თავისი ფუნქციები სხვადასხვა პირობებში. საბრძოლო რეჟიმი სპეციალური ბრძანების გაცემამდე გაგრძელდება.