საქართველოს პრეზიდენტის ადმინისტრაციასთან სალომე ზურაბიშვილის მიერ შეწყალებების გასაპროტესტებლად მოქალაქეები შეიკრიბნენ. მათ პროტესტის ნიშნად, ადმინისტრაციის რკინის კარგს ბოქლომები გაუკეთეს.

აქციის მონაწილეების თქმით, სალომე ზურაბიშვილის მიერ ბოლო დროს განხორციელებული შეწყალების აქტები არის სამარცხვინო. ისინი პრეზიდენტს "მკვლელების შემწყალებლებს" უწოდებენ.

სტუდენტი სალომე ერჩაია ამბობს, რომ არ სჭირდებათ პრეზიდენტი, რომელიც მკვლელებს იწყალებს.

ადმინისტრაციასთან შეწყალებების გასაპროტესტებლაც აქციები გამართეს, როგორც მოძრაობა #სირცხვილიამ, ისე ნაციონალურმა მოძრაობამაც.

საქართველოს მთავარმა პროკურატურამ პრეზიდენტის, სალომე ზურაბიშვილის მიერ პატიმრების შეწყალების საქმეზე გამოძიება დაიწყო. პროკურატურის მიერ გავრცელებულ განცხადებაში არ არის დაკონკრეტებული სამსახურეობრივი უფლებამოსილების გადამეტების საქმეში ვინ ფიგურირებს.

პატიმრების შეწყალება

პრეზიდენტის მიერ შეწყალების სისტემის გამჭვირვალობასთან დაკავშირებით ბოლო რამდენიმე კვირაში არაერთი კითხვა დაისვა. 17 სექტემბერს ცნობილი გახდა, რომ სალომე ზურაბიშვილმა მარიამობას მკვლელობაში მსჯავრდებული კიდევ ერთი პირი, ზურაბ ნადირაძე შეიწყალა. მის ექსტრადიციას საქართველოს მთავრობა 23 წლის განმავლობაში ითხოვდა.

მანამდე ინფორმაცია გავრცელდა, რომ ზურაბიშვილმა 18 წლის დათო ოთხმეზურის მკვლელობისთვის გასამართლებული ასლან ბეჟანიძე შეიწყალა. ბეჟანიძე 2016 წლის მარტში დააკავეს და 11 წელი ჰქონდა მისჯილი.

ამასთანავე, პრეზიდენტმა შეიწყალა პირი, რომელიც ბათუმში პოლიციელის, თარაშ მუკბანიანის მკვლელობისთვის იყო მსჯავრდებული. პოლიციელის მკვლელობისთვის რამაზ დევაძეს 2015 წლის 18 სექტემბერს 12 წლით პატიმრობა მიუსაჯეს.

რამდენიმე კვირის წინ თვითონ სალომე ზურაბიშვილმა მაშინ გადაწყვეტილების განმარტებაზე უარი განაცხადა. მისი თქმით, შეწყალება პრეზიდენტის დისკრეციული უფლებაა.

"ეს უცებ გახდა რაღაც სალაპარაკო პრობლემა იმ დროს, როცა აქ ამდენი არის პოზიტივზე სალაპარაკო. ესეც დიდად არ მიკვირს. თუ რამე განცხადება არის უფრო დეტალური გასაკეთებელი, ეს უნდა გაკეთდეს თბილისში", — თქვა მაშინ ზურაბიშვილმა.

პრეზიდენტის გადაწყვეტილებას კრიტიკით შეხვდნენ როგორც ხელისუფლების, ისე ოპოზიციის წარმომადგენლები. ამასთანავე, მკვლელობისთვის მჯავრდებულთა შეწყალება მიუღებელი აღმოჩნდა მმართველი პარტიის დეპუტატებისთვის. რამდენიმედღიანი კრიტიკის შემდეგ პრეზიდენტი გამოვიდა ინიციატივით, რომ შეწყალების უფლება დაიხვეწოს. დღეს, 18 სექტემბერს მან შეწყალებაზე მორატორიუმი გამოაცხადა.