პატრიოტთა ალიანსის დეპუტატი ირმა ინაშვილი დღეს, 10 სექტემბერს საერთაშორისო კონფერენციაზე მომხდარი ინციდენტის გამო აშშ-ის სახელმწიფო მდივნის ყოფილი თანაშემწისგან, დევიდ კრამერისგან ბოდიშს მოითხოვს.

"ბატონო კრამერ, მე თქვენ ბოდიში უნდა მომიხადოთ. იმიტომ, რომ თქვენ გადააბიჯეთ და შეურაცხყოფა საქართველოს კონსტიტუციას და პარლამენტის წევრს მიაყენეთ. ბოდიში მომიხადეთ", — თქვა ირმა ინაშვილმა სასტუმრო რუმსში მიმდინარე კონფერენციაზე სიტყვით გამოსვლისას.

მანამდე მან თქვა, რომ მისი პარტია პატრიოტთა ალიანსი დასავლური აზროვნებისაა. "იცოდეთ, როცა ბოკერიები, სააკაშვილები და მათი ექსპერტები ჩვენზე საუბრობენ, ყველაფერი ტყუილია", — მიმართა ინაშვილმა კონფერენციის სტუმრებს.

დღეს, 10 სექტემბერს თბილისში, სასტუმრო რუმსში ეკონომიკური პოლიტიკის კვლევის ცენტრისა და მაკკეინის ინსტიტუტის მიერ ორგანიზებულ კონფერენციაზე პატრიოტთა ალიანსის ლიდერის, ირმა ინაშვილის მისვლას ხმაური და დაპირისპირება მოჰყვა.

კონფერენციის ორგანიზატორებმა ინაშვილს განუმარტეს, რომ ის არ იყო სიაში, შესაბამისად, კონფერენცია უნდა დაეტოვებინა. კონფერენციის დატოვებას სთხოვდა მას დევიდ კრამერიც. ინაშვილმა თქვა, რომ გუშინ ამავე კონფერენციაზე დეპუტატმა გიგა ბოკერიამ მისი მისამართით ცილისმწამებლური განცხადება გააკეთა და ის პასუხის გასაცემად მივიდა.

ირმა ინაშვილის პარტია ანტიდასავლური, პრორუსული, ჰომოფობიური და ქსენოფობიური რიტორიკით გამოირჩევა. ისინი სამხედრო მიუმხრობლობას ითხოვენ. გარდა ამისა, პარტიის წევრები ვიზიტებს მართავენ მოსკოვში და საქართველოს ხელისუფლებას რუსეთთან ღია დიალოგისკენ მოუწოდებენ.