იუსტიციის მინისტრობის კანდიდატი, თეა წულუკიანი ამბობს, რომ მამუკა ბახტაძე მისთვის გამორჩეული მინისტრი იყო. ამის შესახებ მან ჟურნალისტებს განუცხადა.

წულუკიანის თქმით, მისთვის, როგორც რიგითი მინისტრისთვის, ბახტაძესთან მუშაობა კომფორტული იყო.

"მან იცოდა მოსმენა, კითხვაზე სწორი პასუხი. ეს ძალიან მნიშვნელოვანია, როდესაც ხელმძღვანელობ ისეთ უწყებას, როგორიც არის იუსტიციის სამინისტრო. მნიშვნელოვანია, პრემიერი პოულობდეს დროს, მოუსმინოს მის მინისტრს და დაეხმაროს მართვაში. მინდა, საჯაროდ მადლობა გადავუხადო მამუკა ბახტაძეს მუშაობის ასეთი ხარისხისთვის", — თქვა მინისტრმა.

7-წლიანი მინისტრობის განმავლობაში თეა წულუკიანმა თანამდებობის დატოვების შესახებ პირველად სწორედ მამუკა ბახტაძის პრემიერობისას ისაუბრა. წულუკიანმა მაშინ თქვა, რომ არსებობდა პრინციპული საკითხი, რის გამოც პოსტს დატოვებდა. მოგვიანებით გაირკვა, რომ საკითხი პენიტენციურ დაწესებულებას ეხებოდა. წულუკიანმა და ბახტაძემ თქვეს, რომ ამ საკითხზე დისკუსია დაასრულეს და თემა ამოწურეს, შესაბამისად, ერთ გუნდში მუშაობას აგრძელებენ.

2 სექტემბერს მამუკა ბახტაძემ პრემიერ-მინისტრის პოსტი დატოვა. ქართულმა ოცნებამ ამ თანამდებობაზე გიორგი გახარია წარადგინა.