თბილისის მერის, კახა კალაძის თქმით, ფირი საკუთარ ავტომობილსაც გადააკრა, რათა ტაქსის მძღოლები დაარწმუნოს, რომ ეს პრობლემას არ წარმოადგენს. მერის შეფასებით, ტაქსების რეფორმის პროექტი კარგად მიმდინარეობს. ამ თემაზე მან ინტერპრესნიუსთან ისაუბრა.

"ჩვენი მხრიდან იყო ყველანაირი ხელშეწყობა, ყველანაირი მხარდაჭერა იმისთვის, რომ არანაირი პრობლემა არ შექმნოდათ ამ ადამიანებს. დავიწყეთ გადაღებვით და ამაზე ზოგს შეექმნა პრობლემა, ამიტომ შემოვიტანეთ ფირის გადაკვრა, რომელიც საერთოდ პრობლემას არ წარმოადგენს. მეც ჩემს საკუთარ ავტომობილზე გადავაკარი ფირი, რათა ეს ადამიანები დამერწმუნებინა, რომ ეს არანაირ პრობლემას არ წარმოადგენს", — აღნიშნა კახა კალაძემ.

მედიასთან საუბრისას მან ასევე თქვა, რომ გადაღებვის და ფირის გადაკვრის ვაუჩერების გაცემის ვადა არ გადაიწევს და 10 აგვისტოს დასრულდება.

თბილისის მერიის ახალი რეგულაციით, 2019 წლის პირველი ოქტომბრიდან ქალაქში თეთრი ფერის ტაქსები იმოძრავებენ. მიმდინარე წლის პირველი ოქტომბრიდან უკვე აიკრძალა ულიცენზიო ტაქსის მოძრაობა. გარდა ამისა, ტაქსის მომსახურებას ვეღარ გაუწევენ სამკარიანია და მარჯვენასაჭიანი ავტომობილები. მერიის რეფორმებს ტაქსის მძღოლების აქციები მოჰყვა, ისინი ამბობდნენ, რომ თეთრად გადაღებვის შემთხვევაში ხარჯი მერიის მიერ გადაცემული ვაუჩერით სრულად ვერ იფარებოდა. გარდა ამისა, მათი განმარტებით, გადაღებილი მანქანის ფასი გადაუღებავთან შედარებით დაბალია. ამის შემდეგ მერიამ მძღოლებს გადაღების ნაცვლად ფირი გადაკვრა შესთავაზა.