უმრავლესობის წევრი, გიორგი ვოლსკი ფარულ ჩანაწერს ეხმაურება, რომელშიც სავარაუდოდ მიხეილ სააკაშვილი და ენმ-ს სხვა წევრები ქვეყანაში მოვლენების რევოლუციური გზით განვითარებაზე საუბრობენ.

მისი თქმით, ცხადია, რომ აღნიშნულ ჩანაწერში მიხეილ სააკაშვილის ჩამოყალიბებული პოზიცია იკვეთება:

"თითოეული ფრაზა, რომელიც გავიგონეთ, გინდა ამოგლიჯე კონტექსტიდან, გინდ რამე სხვა კონტექსტს შეუერთო და გინდა სიტყვები გადაანაცვლო, აბსოლუტურად კონკრეტულ იდეას შეიცავს. ეს კონკრეტული იდეა გამომდინარეობს მთავარი იდეოლოგის, სააკაშვილის ჩამოყალიბებული პოზიციიდან, რომელიც ამ ჩანაწერში ისმის. ახლა როგორ მოხდება გამოძიების პროცესში, როგორ წავა და მერე სასამართლო რას იტყვის, არჩევნებამდე ეს აბსოლუტურად სხვა კონტექსტია".

ფარულ აუდიო ჩანაწერში, რომელიც 27 სექტემბერს გამოქვეყნდა, ისმის მიხეილ სააკაშვილისა და ერთიანი ნაციონალური მოძრაობის ლიდერების ხმა, რომლებიც თითქოს საუბრობენ საქართველოში მოვლენების რევოლუციური სცენარით განვითარებაზე. ჩანაწერში ისმის საუბარი რუსთაველის გამზირის კარვებით გავსებაზე, ივანიშვილის სახლთან აქციებზე, ასევე, მის მიმართ ფიზიკურ ანგარიშსწორებაზე, თუმცა, თავად საუბრის მონაწილეები აცხადებენ, რომ ეს საუბარი რეალური არ არის და ის სახელმწიფო უსაფრთხოების სამსახურის მიერაა დამონტაჟებული.

აღნიშნულთან დაკავშირებით სახელმწიფო უსაფრთხოების სამსახურმა გამოძიება სისხლის სამართლის კოდექსის 315-ე მუხლის 1-ლი ნაწილით დაიწყო. უწყებამ დაკითხვაზე ენმ-ს წევრები დაიბარა, თუმცა ისინი სუსში მისვლას არ აპირებენ.