საპარლამენტო უმრავლესობის წევრი, დიმიტრი ცქიტიშვილი ამბობს, რომ ლევან ვასაძის განცხადებები არის ძალადობისკენ მოწოდება და ამას სახელმწიფომ ადეკვატური პასუხი უნდა გასცეს.

"სამართლებრივად ვერ შევაფასებ ამ განცხადებას, ბუნებრივია, ამას შესაბამისი სტრუქტურა გააკეთებს, მაგრამ ვფიქრობ, ეს საკმაოდ საშიში განცხადებებია", — თქვა ცქიტიშვილმა.

ცქიტიშვილის განცხადებით, სახალხო რაზმების შექმნის შესახებ ლევან ვასაძის განცხადებები გარკვეულწილად არა კონკრეტული რომელიმე ჯგუფის, არამედ სახელმწიფოს გამოწვევა იყო.

"ნებისმიერს შეიძლება ჰქონდეს გამოხატვის უფლება, როგორც არ უნდა მოგვწონდეს თითოეული მხარე, ან ვინმეს როგორ არ უნდა მოწონდეს, მაგრამ არის კონსტიტუცია, არის სამართლებრივი სისტემა და ქვეყანა უნდა დარჩეს ამ სისტემაში. ნებისმიერი, ვინც გამოიწვევს სახელმწიფოს, უნდა მიიღოს შესაბამისი პასუხი, შესაბამისი სტრუქტურების მხრიდან", — აღნიშნა ცქიტიშვილმა.