პროკურატურის ყოფილი მაღალჩინოსანი მირზა სუბელიანი ოთხ დღეში თავისუფალი იქნება. პენიტენციური სამსახურის ცნობით, იგი ციხეს 8 ივლისს დატოვებს. მას ოთხი თვის წინ თბილისის საქალაქო სასამართლომ ერთი წლითა და ერთი თვით მიუსაჯა პატიმრობა, სასჯელის ათვლა კი დაკავების დღიდან [2018 წლის 9 ივნისი] დაიწყო. მირზა სუბელიანს მოსამართლემ ბრალი გადაუკვალიფიცირა დანაშაულის შეუტყობინებლობიდან დანაშაულის დაფარვაში.

მირზა სუბელიანი 9 ივნისს დანაშაულის შეუტყობინებლობის ბრალდებით დააკავეს. წარდგენილი ბრალის თანახმად, პირველ დეკემბერს თბილისში, ხორავას ქუჩა #4-ის მიმდებარე ტერიტორიაზე ორი არასრულწლოვნის მკვლელობის შემდეგ მან გაიგო ერთ-ერთი არასრულწლოვნის, გ.ჯ.-ს დანაშაულის შესახებ და არ შეატყობინა სამართალდამცავ ორგანოებს. ადვოკატის თქმით, სუბელიანი ბრალს აღიარებს.

სასამართლომ აღკვეთის ღონისძიებად მას პატიმრობა 10 ივნისს შეუფარდა. 27 თებერვალს კი სასამართლომ ის პატიმრობაში დატოვა.