12 მაისს ლისის ტბაზე ქვიარ დების გარბენი გაიმართა. როგორც ორგანიზატორები ამბობენ, გარბენი მცდელობაა, ერთმანეთს დაუკავშირდეს ქვიარ და მწვანე პოლიტიკის საკითხები. ქვიარ დების გარბენი ქალთა ინიციატივების მხარდამჭერი ჯგუფისა და ახალგაზრდა მწვანეების ორგანიზებით მოეწყო. უსაფრთხოების ზომების გამო ღონისძიება დახურულად წარიმართა.

პირველი გარბენის იდეა 2018 წელს მას შემდეგ გაჩნდა, რაც ჰომოფობიასა და ტრანსფობიასთან ბრძოლის დღეს სათემო ორგნიზაციებმა ღონისძიებები გააუქმეს.

"რაღაცნაირად ვხუმრობდით კიდეც იმაზე, რომ გარბენი იყო რელევანტური ფორმატი, რადგან აგრესიული ფონის გამო ქვიარ ადამიანები პირდაპირი მნიშვნელობითაც გარბიან ამ ქვეყნიდან", — აცხადებს ქალთა ინიციატივების მხარდამჭერი ჯგუფის წარმომადგენელი, ნათან გულიაშვილი.

ის On.ge-სთან ყვება, რომ წელს გადაწყვიტეს გარბენი ახალგაზრდა მწვანეებთან ერთად გაეკეთებინათ, რადგან ისინიც სოციალურ თემებთან დაკავშირებით აქტიურია.

"მიგვაჩნია, რომ ჩვენი ქვიარ პოლიტიკა ახლოს არის მწვანეების პოლიტიკასთან და ვფიქრობთ, რომ დისკრიმინაციული ჯგუფები ამ ქვეყანაში ბევრია. გადაკვეთის წერტილები სწორედ იქ არის, რომ ჩვენ ერთად ვდგავართ სახელმწიფოს წინაშე, რომელიც არ გვიცავს", — აღნიშნავს გულიაშვილი.

გარბენში მონაწილეობა 40-მდე ადამიანმა მიიღო. ნათან გულიაშვილი ამბობს, რომ მაისის თვეში ჰომოფობიური და აგრესიული განწყობები განსაკუთრებით იჩენს თავს. მისივე თქმით, გამოხატვის ალტერნატიულ ფორმატზე მუდმივად ფიქრობენ:

"სამწუხაროდ ამ ქვეყანაში მალვა ჯერ კიდევ გვიწევს. შარშანდელი გარბენის შემდეგ მივხვდით, რომ ეს იყო დადებითი და გამაძლიერებელი მოვლენა. მუდმივად გვიწევს პროტესტის, აქციის, დაპირისპირების წინაშე გამოსვლა და ამ დროს თემს ძალიან სჭირდება ჯანსაღი აქტივობაც, როგორიც არის გარბენი".

ფოტო: ქალთა ინიციატივების მხარდამჭერი ჯგუფი

ფოტო: ქალთა ინიციატივების მხარდამჭერი ჯგუფი