დუშეთის მუნიციპალიტეტში, სოფელ ჩარგალში 67 წლის ქალი 34 წლის მეზობელ კაცს გაუპატიურების მცდელობაში ადანაშაულებს. ამის შესახებ ინფორმაციას რუსთავი 2 ავრცელებს. გადაცემა შაბათის კურიერის ანონსის მიხედვით, სავარაუდო სექსუალური ძალადობის დროს ქალმა გულის შეტევა მიიღო.

შინაგან საქმეთა სამინისტროში On.ge-ს უთხრეს, რომ საქმეზე გამოძიება სისხლის სამართლის კოდექსის 138-ე მუხლის პირველი ნაწილით მიმდინარეობს, რაც გულისხმობს ძალადობით, ძალადობის მუქარით ან დაზარალებულის უმწეობის გამოყენებით სექსუალური ხასიათის სხვაგვარ ქმედებას, რომელიც არ შეიცავს ამ კოდექსის 137-ე მუხლით (გაუპატიურება) გათვალისწინებული დანაშაულის ნიშნებს. ამ მუხლით გათვალისწინებულია პატიმრობა ოთხიდან ექვს წლამდე.

"შეტყობინების მიღებისთანავე დაიწყო გამოძიება, დაინიშნა შესაბამისი ექსპერტიზები, გამოკითხულია როგორც ორივე მხარე , ასევე ის პირები რომლებსაც შესაძლოა რაიმე სახის ინფორმაცია ჰქონდეთ ფაქტთან დაკავშირებით", — ამბობენ უწყებაში.