თეთრი ხმაურის მოძრაობა დემურ სტურუას საქმესთან დაკავშირებით განცხადებას ავრცელებს. მათი თქმით, საქმეზე გამოძიების დაწყება სამოქალაქო პროტესტისა და საზოგადოების მხრიდან მაღალი ინტერესის დამსახურებაა.

ისინი ყურადღებას ამახვილებენ სტურუას ოჯახის წევრების მიმართ პოლიციის მხრიდან ძალადობის ფაქტზეც. განცხადებაში ნათქვამია, რომ სახელმწიფო როგორც გარდაცვლილის, ასევე დაკავებულის ოჯახის უსაფრთხოებაზეა პასუხისმგებელი. ისინი სახელმწიფოს და პოლიციას უპასუხისმგებლობაში ადანაშაულებენ:

"მმართველ ძალას ახსოვს, თუ როგორ მოვიდა ხელისუფლებაში სწორედ ამ დროს, 4 წლის წინ პატიმრების მიმართ არაადამიანურ მოპყრობის დამადასტურებელი ვიდეომასალით".

ასევე, მოძრაობა აცხადებს, რომ სახელმწიფო თავს იკავებს წინასაარჩევნოდ დასაჯოს პოლიციელი, რადგან არჩევნების დროს პოლიცია ხელისუფლების ერთგვარი რესურსია.

მოძრაობა გრძელვადიან პერსპექტივაში პრობლემის მოგვარებას კანონმდებლობის ცვლილებაში ხედავს. ისინი მთავრობისგან მოითხოვენ ,კანონში ცვლილება არჩევნებამდე მოხდეს.

თეთრი ხმაურის მოძრაობის მთავარი მოთხოვნებია:

• თანამდებობიდან გათავისუფლდეს სამტრედიის პოლიციის უფროსი;
• შეიქმნას გამოძიების მონიტორინგის ჯგუფი სამოქალაქო საზოგადოების მონაწილეობით და დაიწყოს გამოძიება სისტემური დანაშაულის გამოვლენის მიზნით;
• მაქსიმალურად შემჭიდროვებულ ვადებში დასრულდეს გამოძიება დემურ სტურუას, ლაშა ბახუტაშვილის, ბესო ხუციშვილის და ლევან აბზიანიძის საქმეებზე;
• დაუყოვნებლივ და უპირობოდ შეწყდეს ნარკოტესტირების ღირსების შემლახავი პრაქტიკა;
• საქართველოს სისხლის სამართლის კოდექსის 273-ე მუხლით ბრალდებული და მსჯავრდებული პირების მიმართ გამოყენებული იყოს განრიდება;
• პროკურატურამ შუამდგომლობით მიმართოს სასამართლოს საპროცესო შეთანხმების პირობების ცვლილების თაობაზე 260-ე მუხლით გასამართლებული პირებისათვის: თუკი საქმეში მტკიცებულებად არსებული ნარკოტიკული ნივთიერების ოდენობა არ აღემატება ამ ნივთიერების მოხმარების საშუალო დღიურ დოზას, მსჯავრდებულს სასჯელი პირობითად ჩაეთვალოს, ხოლო ისინი, ვინც პირობითი სასჯელის ნახევარზე მეტი მოიხადა, გათავისუფლდნენ პირობითი მსჯავრისაგან.
• პარლამენტის შეკრებამდე მუშაობა განაახლოს ანტინარკოტიკულმა უწყებათაშორისმა საბჭომ, რათა მოხდეს საკანონმდებლო ცვლილებების პაკეტზე შეთანხმება, კერძოდ კი ნივთიერებათა ოდენობის დადგენის და სასჯელის ზომის გადასინჯვის თაობაზე.

მოთხოვნების შესასრულებლად მოძრაობა საქართველოს პრეზიდენტს, პრემიერ მინისტრს, მთავრობას, შსს-ს, იუსტიციის სამინისტროს, სასჯელაღსრულებისა და პრობაციის სამინისტროს, მთავარ პროკურატურას და ყველა მონაწილე მხარეს მიმართავს და დღეს საღამოს 8:30 კანცელარიასთან სანთლების აქციას გეგმავს.