ფოთსა და სენაკში ჩატარებული სპეცოპერაციის შედეგად სამი პირი ე.წ. კანონიერი ქურდობის ბრალდებით დააკავეს. ამის შესახებ ბრიფინგზე შსს-ს ცენტრალური კრიმინალური პოლიციის დეპარტამენტის დირექტორის მოადგილე მამუკა ჭელიძემ განაცხადა.

"გამოძიებამ დაადგინა, რომ ბრალდებულები ე.წ. ქურდული სამყაროს მიერ დადგენილი წესებით მოქმედებდნენ, კერძოდ, დაკავებულებს კავშირი ჰქონდათ უცხოეთში მყოფ ე.წ. კანონიერ ქურდებთან - ლავას ოღლი, იგივე მინდია გორაძესთან, ჯუმბერ ბაირამიდითთან (ზედმეტსახელად "ბონჩო"), სტავრო ბაირამიდთან (ზედმეტსახელად "როკო"), დათო ჩხიკვიშვილთან, მერაბ მზარელუასთან და როლანდ
გეგეჭკორთან", — აღნიშნა მან.

საქმეზე გამოძიება საქართველოს სისხლის სამართლის კოდექსის 223¹ მუხლის პირველი ნაწილით მიმდინარეობს. ამ მუხლით ჩადენილი დანაშაული ისჯება თავისუფლების აღკვეთით ვადით შვიდიდან ათ წლამდე, ჯარიმით ან უამისოდ.