დემურ სტურუას ოჯახის წევრები რუსთავი 2-თან ექსპერტიზის დასკვნას ასაჯაროვებენ. მათი თქმით, ექსპერტიზა სტურუას წამების ფაქტს ადასტურებს:

"ექსპერტიზაში წერია: დემურიკოს მარჯვენა ფეხის წვივზე დაზიანება, ნაცემი და ენის მარცხენა მხარეს ნაწამები. ეს პასუხები ახლა გახდა ცნობილი და ოჯახი ვითხოვთ, სასწრაფოდ, ამ დილით შევიტყვეთ, რომ გოდერძი თევზაძე მიმალვაშია. დაიმალა, გაქცეულა."

22 წლის დემურ სტურუამ 8 აგვისტოს თავი მოიკლა. სტურუამ თვითმკვლელობამდე დაწერილ წერილში აღწერა, თუ როგორ აიძულებდა პოლიციელი თანასოფლელების შესახებ მაკომპრომეტირებელი მასალების მოგროვებას მარიხუანის შესახებ.

დღეს საქართველოს მთავარმა პროკურატურამ დემურ სტურუას თვითმკვლელობის საქმეზე პოლიციის თანამშრომელს ბრალი წაუყენა. საქმეზე გამოძიება გრძელდება სისხლის სამართლის კოდექსის 115-ე და 333-ე მუხლის მე-3 ნაწილით, რაც სასჯელის სახედ ითვალისწინებს 5-დან 8 წლამდე თავისუფლების აღკვეთას. ბრალდებული პოლიციელი მიმალვაშია.