კიევში ეკლესიის გაერთიანებულ კრებაზე უკრაინის მართლმადიდებლური ავტოკეფალური ეკლესია შეიქმნა. ეკლესიის წინამძღოლად 39 წლის მიტროპოლიტი ეპიფანი აირჩიეს. ის კიევის საპატრიარქოში მსახურობდა. გაერთიანებულ კრებას სასულიერო პირებთან ერთად ესწრებოდა უკრაინის პრეზიდენტი, პეტრო პოროშენკოც.

"ეს ეკლესია არის პუტინის გარეშე, ეს ეკლესია არის კირილეს გარეშე, ეს ეკლესია არის რუსული ძალისა და რუსული არმიის მიმართ ლოცვების გარეშე, რადგან რუსული ხელისუფლება და რუსული ჯარები კლავენ უკრაინელებს. მაგრამ ეს არის ეკლესია ღმერთთან ერთად", - განაცხადა პოროშენკომ.

მისივე თქმით, 15 დეკემბერი ისტორიაში შევა, როგორც უკრაინისთვის წმინდა დღედ, როდესაც უკრაინა რუსეთისგან საბოლოო დამოუკიდებლობას მიიღებს.

დილიდან წმინდა სოფიას ტაძრის გარშემო ათასობით ადამიანი იყო შეკრებილი. ისინი დამოუკიდებელი ეკლესიის შექმნის იდეას უჭერდნენ მხარს.

პეტრო პოროშენკო და მიტროპოლიტი ეპიფანი

ფოტო: Reuters

გაერთიანებულ კრებაში მონაწილეობას იღებდნენ უკრაინის ავტოკეფალური მართლმადიდებლური ეკლესიის, უკრაინის მართლმადიდებლური ეკლესიის კიევისა და მოსკოვის საპატრიარქოს წარმომადგენლები. მოსკოვის საპატრიარქოდან ესწრებოდა მხოლოდ ორი სასულიერო პირი, რადგან მოსკოვის საპატრიარქომ კრებაში მონაწილეობაზე უარი თქვა. სწორედ ამ ეკლესიების წარმომადგენლებმა შექმნეს უკრაინის დამოუკიდებელი და ერთიანი ეკლესია.

კრებამდე ერთი დღით ადრე რუსეთის პატრიარქმა კირილმა მიმართა ადგილობრივი ეკლესიის წარმომადგენლებს, რომის პაპსა და გაეროს გენერალურ მდივანს და განაცხადა, რომ "ყველაზე დიდი რელიგიური კონფესია უნდა ჩაანაცვლოს რაღაცა ახ რელიგიურმა ორგანიზაციამ". მან, ასევე, უკრაინა თავისი პოლიტიკური მიზნებისთვის ეკლესიის გამოყენებაში დაადანაშაულა.

უკრაინის ეკლესიის ავტოკეფალიის საკითხი

კონსტანტინოპოლის წმინდა სინოდმა უკრაინის ეკლესიის ავტოკეფალიის მინიჭების პროცესი დაიწყო. კონსტანტინოპოლის განცხადების თანახმად, გაუქმდა 1686 წელს სინოდის მიერ მიღებული გადაწყვეტილება, რომელიც მოსკოვის საპატრიარქოს ნებას რთავდა კიევის სამიტროპოლია საკუთარ დაქვემდებარებაში მოექცია.

ავტოკეფალიის აღიარების საპასუხოდ, რუსეთის მართლმადიდებელმა ეკლესიამ და უკრაინის მართლმადიდებელი ეკლესიის მოსკოვის საპატრიარქომ კონსტანტინოპოლის ეკლესიასთან ევქარისტული კავშირი სრულად გაწყვიტა. როგორც რუსული ეკლესიის წარმომადგენელმა განაცხადა ეს იძულებითი გადაწყვეტილება იყო და იმედი აქვთ კონსტანტინოპოლი აზრს შეიცვლის.

კიევის პატრიარქმა ფილარეტმა განაცხადა, რომ ავტოკეფალიის საკითხში საქართველოს მართლმადიდებელი ეკლესიის საპატრიარქოს მხარდაჭერის იმედი აქვს. თუმცა, საქართველოს საპატრიარქომ პოზიციის დაფიქსირებას თავის შეკავება არჩია. თავდაპირველად საპატრიარქომ ამის მიზეზად ის დაასახელა, რომ კანონიკური სამართლის ნორმებზე დაფუძნებული თითოეული მხარის ოფიციალურ და საბოლოო პოზიციას ელოდებოდა.

უკრაინის და საქართველო

ავტოკეფალიის საკითხში კიევის პატრიარქი საქართველოს მხარდაჭერას ელოდება.

"საქართველოს ეკლესიას უნდა ახსოვდეს თავისი ისტორია", — განაცხადა კიევის პატრიარქმა, ფილარეტმა. როგორც ცნობილია, კიევის პატრიარქს საქართველოს კათოლიკოს-პატრიარქთან საუბარი არ ჰქონია.

საქართველოს საპატრიარქომ პოზიციის დაფიქსირებას თავის შეკავება არჩია. ამის მიზეზად კი ის დაასახელა, რომ კანონიკური სამართლის ნორმებზე დაფუძნებული თითოეული მხარის ოფიციალურ და საბოლოო პოზიციას ელოდება.

პატრიარქის მდივნის, მიქაელ ბოტკოველის განცხადებით, სინოდის სხდომა გადაწყვეტს რა პოზიცია ექნება საქართველოს უკრაინის ეკლესიის ავტოკეფალიასთან მიმართებაში. თუმცა მისივე თქმით, ოკუპაციის პირობებში კონსტანტინოპოლის ეკლესიის უპირობო მხარდაჭერა არასწორია.