უნგრეთში შრომის ახალ კანონს საპროტესტო აქციები მოჰყვა. აქციის მონაწილეები მას მონურს უწოდებენ. ახალი კანონის მიხედვით, კომპანიას შეუძლია თანამშრომელი ზეგანაკვეთურად 400 საათი ამუშაოს, კუთვნილი ანაზღაურების გადახდა კი სამი წლით გადაუვადოს.

პარლამენტის შენობის წინ მიმდინარე აქციის მონაწილეების წინააღმდეგ პოლიციამ ცრემლსადენი გაზი გამოიყენა. დემონსტრანტები ბლოკავდნენ პარლამენტის შენობის კიბეებს.

კანონპროექტის მიღება გააპროტესტეს დეპუტატებმა პარლამენტის დარბაზში. განხილვა სტვენისა და შეძახილების ფონზე წარიმართა.

ფოტო: Attila Kisbenedek / AFP / Getty Images

BBC-ის ინფორმაციით, უნგრეთში აქამდე კომპანიას შეეძლო წელიწადში 250 ზეგანაკვეთური სამუშაო საათი მოეთხოვა. მათთვის, ვინც დღეში რვა საათს მუშაობს, ახალი, 400-საათიანი ზეგანაკვეთური დრო დღეში დამატებით ერთ საათს უდრის, ხოლო წლის ბოლო დამატებით 50 სამუშაო დღეა.

უნგრეთის პრემიერ-მინისტრს, ვიქტორ ორბანს მიაჩნია, რომ შრომის ახალი კანონი წაადგება როგორც დამსაქმებელს, ისე დასაქმებულს.

"ჩვენ უნდა მოვშალოთ ბიუროკრატიული წესები, რათა მათ, ვისაც სურთ მუშაობა და მეტის შემოსავლის მიღება, შეძლონ ამის გაკეთება", — განაცხადა მან. აღნიშნულ გადაწყვეტილებას არც პროფკავშირები და არც ოპოზიცია არ ეთანხმება.

გარდა ამისა, პარლამენტმა დაამტკიცა ადმინისტრაციული სასამართლოების შექმნის სისტემა, რომელიც იუსტიციის სამინისტროს დაექვემდებარება. ოპოზიციას მიაჩნია, რომ ახალი ორგანო დამოუკიდებელი არ იქნება.

ევროკავშირი უნგრეთს მედიასა და უმცირესობებზე თავდასხმაში ადანაშაულებს. მიმდინარე წლის სექტემბერში ევროპარლამენტმა პირველად გადაწყვიტა ევროკავშირის წევრი ქვეყნის, კერძოდ კი, უნგრეთის დასჯა. ევროპარლამენტის ანგარიშში საუბარია უნგრეთში ხელისუფლების შტოების პრინციპების დარღვევაზე, პოლიტიკური თავისუფლების შეზღუდვასა და კორუფციაზე.

თავის რეზოლუციაში ევროპარლამენტი მოუწოდებს ევროპულ საბჭოს, უნგრეთის მიმართებით კონკრეტული პროცედურები ევროკავშირის დებულების შესაბამისად გაატაროს. ამ შემთხვევაში კი მეშვიდე მუხლით იხელმძღვანელოს, რომელშიც დარღვევის აღმოფხვრის რეკომენდაციებზეა საუბარი. ამავე დროს, უნგრეთს ხმის მიცემის უფლების ჩამორთმევა ჯერჯერობით არ ემუქრება.