შავი ზღვის საერთაშორისო უნივერსიტეტს პირველკურსელი სტუდენტების მიღების შეზღუდვა მოეხსნა. ამის შესახებ ინფორმაცია On.ge-ს განათლების სამინისტროდან მიაწოდეს.

განათლების სამინისტროში ამბობენ, რომ გადაწყვეტილება უკვე ძალაშია და ის 10 დღის ვადაში გამოქვეყნდება.

შავი ზღვის საერთაშორისო უნივერსიტეტს სტუდენტების მიღების უფლება ერთი წლის ვადით 2018 წლის აგვისტოში შეეზღუდა. უმაღლესი საგანმანათლებლო დაწესებულებების ავტორიზაციის საბჭოს მიერ 2018 წლის 20 აგვისტოს მიღებული გადაწყვეტილებით, მიუხედავად იმისა, რომ სასწავლებელს ავტორიზაცია 6 წლით გაუგრძელდა, 2018 წელს სტუდენტებს ვერ მიიღებდა.

ავტორიზაციის შეჩერების მიზეზად უნივერსიტეტის ფინანსური პრობლემები, კერძოდ საგადასახადო ჯარიმა, 700 ათასი ლარი დასახელდა, რაც უნივერსიტეტმა 26 აგვისტოს გადაიხადა. თანხის გადახდიდან რამდენიმე თვეში ავტორიზაციის საბჭომ ისევ იმსჯელა სტუდენტების მიღების უფლების საკითხზე და უნივერსიტეტს ეს უფლება მისცა.