საქართველოს ყოფილი პრეზიდენტის, მიხეილ სააკაშვილის განცხადებით, მას საქართველოში არც ერთი თანამდებობა არ სურს. ამის შესახებ მან პალიტრანიუსის გადაცემაში, 360 გრადუსი განაცხადა.

სააკაშვილის თქმით, ის უბრალოდ მხარს უჭერს გრიგოლ ვაშაძის გუნდს, რომელიც "მაგარი ახალგაზრდებითაა დაკომპლექტებული".

"ჩვენ საქართველოს ისტორიაში ერთ-ერთი ყველაზე წარმატებული ხელისუფლება ვიყავით, მაგრამ ის ხელისუფლება აღარ უნდა დაბრუნდეს. მე არსად დაბრუნებას არ ვაპირებ, არც ერთი თანამდებობა არ მინდა საქართველოში, მაგრამ უზრუნველვყოფ და ვიქნები მათი მხარდაჭერი", — განაცხადა სააკაშვილმა.

ის ამბობს, რომ არის პოლიტიკოსი, რომლის სიტყვას მთელ მსოფლიოსა და რეგიონში უჯერებენ.

"მე მაქვს გამოცდილება, რომელიც მინდა, ამ ხალხს გადავცე", — განაცხადა სააკაშვილმა.

გაერთიანებული ოპოზიციის საპრეზიდენტო კანდიდატის, გრიგოლ ვაშაძის განცხადებით, პრეზიდენტად არჩევის შემთხვევაში პოლიტიკურ პატიმრებს შეიწყალებს. იმედის ჟურნალისტის კითხვაზე იქნებიან თუ არა შეწყალებულებს შორის ყოფილი მაღალჩნოსნები ვაშაძე პასუხობს "რა თქმა უნდა".

საქართველოს ყოფილი პრეზიდენტი, მიხეილ სააკაშვილი აცხადებს, რომ ოპოზიციის კანდიდატის, გრიგოლ ვაშაძის გაპრეზიდენტების შემთხვევაში, ის არ აპირებს მას შეწყალებით მიმართოს. სააკაშვილი გეგავს, რომ საკუთარი უფლებები სამართლებრივად დაიცვას.

ბიძინა ივანიშვილი ამბობს, რომ ყოფილი ხელისუფლების წევრების გათავისუფლება დესტაბილიზაციის საფრთხეს შეიცავს.

შესწორება: ნიუსის თავდაპირველ ვერსიაში აღნიშნული იყო, რომ "მიხეილ სააკაშვილი საქართველოში დაბრუნებას არ აპირებს". სააკაშვილის ციტატაში დაზუსტებით არ იკითხება, რომ ის საქართველოში არ აპირებს დაბრუნებას, შესაბამისად, სათაური ჩასწორდა.