პარტია ევროპული საქართველოს წევრმა, გიგი უგულავამ ტოკ-შოუ რეაქციაში გაერთიანებული ოპოზიციის, ძალა ერთობაშიას საპრეზიდენტო კანდიდატი, გრიგოლ ვაშაძე გააკრიტიკა და ქართული ფილმის, მიმინოს ერთ-ერთ გმირს შეადარა.

"გრიგოლ ვაშაძე თავისი ნატურით არის მიმინოდან ნუგზარი. ასეთი პერსონაჟი საქართველოს საზოგადოებას პრეზიდენტად არ უნდა და წერტილი", — განაცხადა უგულავამ.

უგულავას თქმით, გრიგოლ ვაშაძის კანდიდატურას შავი ლაქები აქვს, თუმცა არ დაუკონკრეტებია, რას გულისხმობდა.

გიგი უგულავას კრიტიკას გამოეხმაურა ნაციონალური მოძრაობის წევრი, ზაალ უდუმაშვილი. მისი თქმით, სამარცხვინოა, რომ თავისი საეთერო დროის ყველაზე დიდ ნაწილს პირდაპირ თუ ირიბად უთმობს მეორე ოპოზიციური კანდიდატის კრიტიკას, რაც არის სამარცხვინო.

"შავი ლაქების არ ვიცი, მაგრამ შავი ღრუბელი რომ ადგათ, ნამდვილად ვიცი", — განაცხადა უდუმაშვილმა.

ნაციონალურ მოძრაობასა და ევროპულ საქართველოს შორის გაფორმებული ე.წ. თავდაუსხმელობის შეთანხმება პირველად გრიგოლ ვაშაძემ დაარღვია. მან კახეთში ამომრჩეველთან შეხვედრაზე გრიგოლ ვაშაძემ ევროპული საქართველო გააკრიტიკა და 2017 წლის ადგილობრივი არჩევნების გაყალბებაში დაადანაშაულა.

11 ივლისს ევროპულმა საქართველომ და ერთიანმა ნაციონალურმა მოძრაობამ საპრეზიდენტო არჩევნებისთვის სამპუნქტიან შეთანხმებას მოაწერეს ხელი. შეთანხმების თანახმად წინასაარჩევნო კამპანიის დროს პარტიებმა ერთმანეთზე შეტევისა და კრიტიკისგან თავი უნდა შეიკავონ.

დოკუმენტის ძირითადი სამი პუნქტი:

  • მხარს დავუჭერთ მეორე ტურში გასულ ერთმანეთის საპრეზიდენტო კანდიდატებს (რომელიც გავა);
  • კამპანიის დროს თავს შევიკავებთ ერთმანეთზე შეტევის და კრიტიკისგან;
  • არჩევნების პირველ და მეორე ტურებში მაქსიმალურად მოვახდენთ ამომრჩევლის მობილიზებას, რადგან არჩევნებია ხელისუფლების შეცვლის გზა.