2018 წლის პირველ 8 თვეში, განათლების, მეცნიერების, კულტურისა და სპორტის სამინისტროს სამ პროგრამაზე ბიუჯეტიდან გამოყოფილი თანხა საერთოდ არ დაიხარჯა. ამის შესახებ აუდიტის სამსახურის 2018 წლის სახელმწიფო ბიუჯეტის შესრულების მიმდინარეობის შესახებ ანგარიშშია ნათქვამი.

აუდიტის სამსახურის შეფასებით, ბიუჯეტის თანხების პირველ 8 თვეში პროგრამებისთვის გამოყოფილი თანხების აუთვისებლობა ეჭვქვეშ აყენებს წლის ბოლომდე დაფინანსების სრულად გამოყენების საკითხს.

უფრო კონკრეტულად, ნულოვანი ათვისების პროგრამებია:

• სკოლამდელი განათლების ხელშეწყობა, წლიური გეგმა 140 ათასი ლარი;
• სამეცნიერო და ტექნოლოგიური პროექტების ხელშეწყობა, წლიური გეგმა 1 მილიონი ლარია;
• თბილისის საჯარო სკოლების რეაბილიტაციისა და ენერგოეფექტურობის გაზრდის პროექტი, წლიური გეგმა 10 მილიონ 200 ათასი.

აუდიტის სამსახურის 2018 წლის ბიუჯეტის ანგარიშის მიხედვით, რამდენიმე პროგრამა გამოყოფილი დაფინანსების ათვისების დაბალი მაჩვენებელი აქვს როგორც ბიუჯეტის კანონით დამტკიცებულ, ასევე დაზუსტებულ გეგმასთან მიმართებით.

მაგალითად:

• პროგრამა "დავისვენოთ და ვისწავლოთ ერთად" — რვა თვის მონაცემებით, ათვისებულია მხოლოდ 393 ათასი ლარი, რაც ცხრა თვის დამტკიცებული გეგმის 24,2%-ია და წლიური ბიუჯეტის (2 800 000) 14,1%-ს შეადგენს;
• პროგრამა "ვისწავლოთ საქართველოში" — რვა თვის მონაცემებით ათვისებულია მხოლოდ 75 000 ლარი, რაც ცხრა თვის დამტკიცებული გეგმის 32,5-ია, ხოლო წლიური ბიუჯეტის (2 800 000) 2,7%;
• ახალგაზრდული პოლიტიკის განვითარების პროგრამა — რვა თვის მონაცემებით ათვისებულია მხოლოდ 18 000 ლარი, რაც ცხრა თვის დამტკიცებული გეგმის 19,5%-ია, ხოლო წლიური ბიუჯეტის (550 000 ლარი) 3,2%.

განათლების, მეცნიერების, კულტურისა და სპორტის სამინისტროდან განმარტებას On.ge ამ დრომდე ელოდება. უწყების პასუხს აუდიტის დასკვნაზე მიღებისთანავე შემოგთავაზებთ.

პროგრამები, რომლებზეც ბიუჯეტიდან 2018 წლის პირველ 8 თვეში არაფერი დახარჯულა, განათლების მინისტრების მხრიდან ხშირად დასახელებულა, როგორც პრიორიტეტული. მათ შორის სამეცნიერო და ტექნოლოგიური პროექტები, სკოლების რეაბილიტაცია და ინფრასტრუქტურის გაუმჯობესება.

2018 წლის ბიუჯეტი საქართველოს პარლამენტში განსახილველად 30 ნოემბერს დარეგისტრირდა. ამ დროს განათლების ყოფილ მინისტრს ალექსანდრე ჯეჯელავა უკვე გათავისუფლებული იყო თანამდებობიდან, ხოლო ყოფილი მინისტრი მიხეილ ჩხენკელი ახალი დანიშნული. 2018 წლიდან ამ ბიუჯეტის მიხედვით მიხეილ ჩხენკელს უნდა ემუშავა. 2018 წლის ივნისში, 7 თვის დანიშნული მინისტრი მიხეილ ბატიაშვილით ჩაანაცვლეს. ამ უკანასკნელმა კი განათლების რეფორმა ორი თვის შემდეგ სექტემბერში წარადგინა.

აქვე უნდა აღინიშნოს, რომ 2018 წელს ბიუჯეტიდან აუთვისებელი თანხები ფონზე მთავრობა მომავალ წლებში განათლების რადიკალურ და მასშტაბურ რეფორმას გეგმავს. ამისთვის ეკონომიკური თავისუფლების აქტში ცვლილება შედის. 2019 წლის ბიუჯეტის დაგეგმვის ფარგლებში მომზადებული კანონპროექტით, მთავრობას უფლება ექნება განათლების რეფორმისთვის იმაზე მეტი დახარჯოს, ვიდრე დადგენილია. თუმცა აუდიტის დასკვნით ჩანს, რომ იმასაც ვერ ხარჯავს, რაც მოითხოვა.